كوكشەتاۋدا 40 تان استام ءۇيدى سۋ الىپ قالدى - فوتو
بۇل تۋرالى كوكشەتاۋ قالاسى اكىمىنىڭ باسپا ءسوز حاتشىسى دينارا جاكەيەۆا ءمالىم ەتتى.
ونىڭ ايتۋىنشا، جاڭبىر سۋىنان نەگىزىنەن قالانىڭ جەكە مەنشىك سەكتورلارى زارداپ شەككەن. اسىرەسە، ءۋاليحانوۆ، كەنەسارى، بەيبىتشىلىك، ءبىرجان سال جانە كاپتسەيەۆيچ كوشەلەرىنىڭ بويىنداعى 40 تان استام ۇيلەر سۋدا قالعان.
قازىرگى كەزدە سۋ العان ايماقتاردا قالانىڭ كوممۋنالدىق كاسىپورىندارىنىڭ ارنايى تەحنيكالارى سۋ سورۋ جۇمىستارىن جۇرگىزۋدە. سونداي-اق، وسىناۋ جۇمىستارعا ايماقتىق ت ج د-نىڭ تەحنيكالارى مەن ادامدارى تارتىلعان.
توتەنشە جاعدايعا بايلانىستى قالا اكىمدىگىمەن وبلىس ورتالىعىنداعى ءبىلىم، دەنساۋلىق، مادەنيەت جانە باسقا دا تۇرعىن جايلارعا كەلتىرىلگەن تابيعات اپاتىنىڭ زارداپتارى مەن كولەمىن انىقتاۋ ماقساتىندا جۇمىس توبى قۇرىلدى. سونىمەن قاتار، باسپاناسىن سۋ الىپ قالعان ادامداردى قاۋىپسىز جەرگە كوشىرۋ ءۇشىن 50 ورىندىق ۋاقىتشا تۇراق تا ازىرلەنگەن.
ەسكە سالا كەتسەك، ءتۇنى بويى تولاسسىز جاۋعان جاڭبىردىڭ سالدارىنان قالانىڭ گوركيي مەن سيەۆەرنايا كوشەلەرىنىڭ قيىلىسى توپان سۋدىڭ استىندا قالعان بولاتىن. بۇل اۋماقتان ادام تۇگىلى تەحنيكانىڭ ءوتۋى ەكىتالاي. قازىر بۇل جەردە ءۇش ءورت ءسوندىرۋ تەحنيكاسى جاڭبىر سۋىن ءقاۋىپسىز جەرگە اعىزىپ جىبەرۋدە.