كۇش قۇرىلىمدارىنىڭ قاۋقارىن كۇشەيتۋگە 400 ميلليارد تەڭگەدەن استام قارجى بولىنەدى
ماجىلىستە ق ر قارجى ءمينيسترىنىڭ ورىنباسارى تاتيانا ساۆەليەۆا قاڭتار وقيعاسىندا زارداپ شەككەن شاعىن جانە ورتا بيزنەس سۋبەكتىلەرىن قولداۋعا بولىنەتىن قاراجاتتىڭ مولشەرى ناقتىلانعانىن ءمالىم ەتتى.
«بيۋدجەتتى ناقتىلاۋ اياسىندا كۇش قۇرىلىمدارىنىڭ جاۋىنگەرلىك ازىرلىگى مەن جاراقتاندىرىلۋىن ارتتىرۋعا قوسىمشا 441 ميلليارد تەڭگە قاراستىرىلعان. اتاپ ايتقاندا، قاڭتار وقيعالارىنىڭ سالدارىن جويۋعا جانە وتەماقى تولەۋگە جالپى سوماسى 4,1 ميلليارد تەڭگەگە قاراجات باعىتتالاتىن بولادى. بۇل شىعىندار زارداپ شەككەن تەحنيكانى، عيماراتتاردى جوندەۋگە جانە قالپىنا كەلتىرۋگە باعىتتالادى. قازىرگى ۋاقىتتا قازا تاپقان قىزمەتكەرلەردىڭ وتباسىلارىنا قاجەتتى جاردەماقى مەن وتەماقى تولەندى. بۇدان باسقا، ماتەريالدىق جانە تۇرعىن ءۇي كومەگىن وڭىرلەر كورسەتەدى»، - دەدى ۆيتسە- مينيستر.
ايتۋىنشا، كۇش قۇرىلىمدارى وكىلدەرىنىڭ سانى مەن ايلىعىن كوبەيتۋگە 92 ميلليارد تەڭگە بولىنبەك.
«بارلىق الەۋەتتى ورگانداردىڭ ارنايى بولىمشەلەرىنىڭ قىزمەتكەرلەرى مەن اسكەري قىزمەتشىلەرى ءۇشىن ەڭبەكاقى ورتا ەسەپپەن 20-دان % 40- عا دەيىن ۇلعايدى. سونداي- اق، ءى ءى م، ۇلتتىق ۇلان جانە قورعانىس مينيسترلىگىنىڭ ارنايى كولىك قۇرالدارىمەن جابدىقتالعان ارنايى بولىمشەلەرىنىڭ سانىن ارتتىرۋ جوسپارلانعان. ماتەريالدىق- تەحنيكالىق بازانى تولىقتىرۋعا 91 ميلليارد تەڭگە بولىنەدى. ونىڭ ىشىندە اسكەري- كولىك اۆياتسياسى پاركىنە 15,5 ميلليارد تەڭگە ءبولىندى. قابىلدانعان شارالار قوعامدىق قاۋىپسىزدىك دەڭگەيىن ارتتىرۋعا، داعدارىس جاعدايلارىنا جەدەل دەن قويۋعا جانە تۇتاستاي العاندا كۇشتىك ورگانداردىڭ بەدەلىن ارتتىرۋعا ىقپال ەتەدى»، - دەدى تاتيانا ساۆەليەۆا.
ايتا كەتەيىك، بۇعان دەيىن ق ر ۇلتتىق ەكونوميكا ءمينيسترى الىبەك قۋانتىروۆ جۋرناليستەرگە ۇلتتىق قوردان كەپىلدەندىرىلگەن ترانسفەرتتى ناقتىلاۋ نە ءۇشىن قاجەت بولعانىن تۇسىندىرگەن بولاتىن.
اۆتور: ەسىمجان ناقتىباي