سوڭعى كۇندەرى قىزىلوردا وبلىسىندا جۇمىرتقا تاپشىلىعى ايقىن سەزىلدى. بۇل اتالعان ءونىم باعاسىنىڭ اسپانداپ كەتۋىنە الىپ كەلدى. جەرگىلىكتى تۇرعىندار الەۋمەتتىك جەلىدە ونىڭ 1 داناسىن 55-60 تەڭگەگە ساتىپ الىپ جاتقانىن جازۋدا. وبلىستىق اۋىل شارۋاشىلىعى باسقارماسىنىڭ باسشىسى شاحماردان قويشىبايەۆ بۇگىن وڭىرلىك كوممۋنيكاتسيالار قىزمەتى الاڭىندا بريفينگ وتكىزىپ، ەلىمىزدە تىركەلگەن قۇس تۇماۋى جۇمىرتقا باعاسىنا كەرى اسەر ەتكەنىن ايتتى. دۇكەن سورەلەرىندە اتالعان ءونىمنىڭ تاپشىلىعى دا سەزىلگەن. ونىڭ ۇستىنە تاۋىققا بەرىلەتىن جەمنىڭ باعاسى وسكەن. سونىڭ سالدارىنان وبلىسقا كەلەتىن جۇمىرتقانىڭ كولەمى ءبىرشاما ازايعان. ءمالىم ەتىلگەندەي، قىزىلوردا وبلىسىنا الداعى ءۇش كۇندە 3 ميلليون دانا جۇمىرتقا جەتكىزىلەدى. ال 600 مىڭ داناسىنان استامى بۇگىن كەلەدى.
«ايماقتا جۇمىرتقا وندىرەتىن ەكى كاسىپورىن بار. ونىڭ قۋاتتىلىعى ىشكى نارىقتىڭ قاجەتتىلىگىن تولىق قامتاماسىز ەتە المايدى. سول سەبەپتى سىرتتان تاسىمالداۋعا تاۋەلدىمىز. قازىرگى تاڭدا كاسىپكەرلەرمەن كەلىسسوز جۇرگىزىلۋدە. بيىلعى جىلدىڭ 25-جەلتوقسانىنا دەيىن جۇمىرتقا تيەلگەن سەگىز جۇك كولىگى وبلىسقا كەلەدى. الداعى مەرەكە كۇندەرى دە تاپشىلىقتى بولدىرماۋ ماقساتىندا جۇمىرتقا جەتكىزىلەدى. وبلىستا جۇمىرتقاعا تاپشىلىق بولمايدى»، - دەدى باسقارما باسشىسى.
تاپشىلىقتى بولدىرماۋ ماقساتىندا جەرگىلىكتى بيۋدجەتتەن 400 ميلليون تەڭگە قارجى بولىنگەن. «بايقوڭىر» الەۋمەتتىك- كاسىپكەرلىك كورپوراتسياسى» ا ق ارقىلى 8 كاسىپكەرگە 50 ميلليون تەڭگەدەن اينالىم قاراجاتى بەرىلگەن.
«ءبىزدىڭ باستى ماقساتىمىز - نەگىزگى الەۋمەتتىك ماڭىزى بار ونىمدەردىڭ تاپشىلىعىن بولدىرماۋ. ماسەلەن، كاسىپكەرلەر قۇس فابريكالارىنان جۇمىرتقانىڭ ءبىر داناسىن 36 تەڭگەدەن الىپ جاتىر. اينالىم قاراجاتىن العان كاسىپكەرلەر ەندى اتالعان ءونىمدى قىمبات ساتپايدى. الىپساتارلىققا جول بەرمەۋ ءۇشىن باقىلاۋ جۇرگىزەمىز. ال باسقا ونىمدەرگە ەكونوميكالىق جاعىنان ءتيىمسىز بولعاندىقتان شەكتى باعا قويىپ وتىرعان جوقپىز. ويتكەنى، قولدان تاپشىلىق جاسالادى»، - دەدى ش. قويشىبايەۆ.