مەرەكە كۇنى 400 دەن استام ەلوردالىق وتباسى باسپانالى بولدى
بۇگىن استانالىق وتباسىلارعا قالا اكىمدىگىنىڭ تاپسىرىسىمەن «نۇرلى جەر» باعدارلاماسىنىڭ اياسىندا تۇرعىزىلعان 364 پاتەر كىلتى تابىس ەتىلدى، ونىڭ 182 ى تۇرمىسى تومەن وتباسى.
«قازىرگى تاڭدا تۇرعىنداردى باسپانامەن قامتۋ باعىتىندا ناقتى شارالار قابىلدانىپ، ءبىرقاتار باعدارلامالار جۇزەگە اسىرىلۋدا. سونىڭ ناتيجەسىندە بۇگىنگى مەرەكەگە بايلانىستى 400-دەن استام استانالىق باسپانالى بولدى. بۇل ءار وتباسى ءۇشىن ەرەكشە قۋانىش. جالپى بيىلعى جوسپار بويىنشا 1,9 مىڭ پاتەردەن تۇراتىن 7 تۇرعىن ءۇي كەشەنى پايدالانۋعا بەرىلەدى»، - دەدى قالا اكىمى باقىت سۇلتانوۆ.
ەسكە سالا كەتسەك، ب. سۇلتانوۆ جۋىردا ەلوردالىق كوپبالالى جانە تۇرمىسى تومەن وتباسىلارمەن كەزدەسۋ بارىسىندا اكىمدىكتىڭ تۇرعىن ءۇي ماسەلەسىنە قاتىستى بيىلعى جوسپارىمەن تانىستىرعان بولاتىن.
«تۇرمىسى تومەن جانە كوپبالالى وتباسىلاردى تولعاندىراتىن باستى ماسەلەلەردىڭ ءبىرى تۇرعىن ءۇي. بۇگىندە باس قالادا 45 مىڭ ادام تۇرعىن ءۇي كەزەگىندە تۇر، ونىڭ 20 مىڭىنىڭ تۇرمىسى ناشار، كوپبالالى جانە مۇگەدەك مۇشەسى بار وتباسىلار. 22 مىڭ وتباسى مەملەكەتتىك قىزمەت جانە بيۋدجەت قىزمەتكەرلەرى. قازىرگى ۋاقىتتا وسى تىزىمدەگىلەردىڭ 188 ىنە پاتەر بەرىلدى، جالپى جوسپار بويىنشا بيىل 781 پاتەر بەرىلۋى ءتيىس، ءبىراق بۇدان بولەك جىل سوڭىنا دەيىن الەۋمەتتىك جاعىنان وسال توپقا جاتاتىن وتباسىلارعا قوسىمشا قارجىلاندىرۋ ەسەبىنەن تاعى 1800-1900 پاتەر بەرىلەدى»، - دەدى قالا باسشىسى.