الماتىدا 400 ادام ماسكا تاقپاعانى ءۇشىن 83 مىڭ تەڭگە ايىپپۇل تولەيتىن بولدى

الماتى. قازاقپارات - الماتىدا 400 ادام ماسكا تاقپاعانى ءۇشىن 83 مىڭ تەڭگە كولەمىندە ايىپپۇل تولەيتىن بولدى.

بۇل تۋرالى الماتى اكىمى باقىتجان ساعىنتايەۆ تىكەلەي ەفير بارىسىندا ايتتى، دەپ حابارلايدى قازاقپارات ءتىلشىسى. قالادا قازىر قوعامدىق ورىنداردا، ايالدامالاردا، پودەزدەر مەن دۇكەندەردە ماسكا تاعۋ تۋرالى اقپاراتتار جاپسىرىلعان. «ءبىراق، كەيبىر ازاماتتار ماسكانى تاقپاي، قالتاسىنا سالىپ جۇرەدى. ىڭعايسىز ەكەنى راس. ءبىراق، ءبىز بۇل ادەتكە ۇيرەنۋىمىز كەرەك. ءوز دەنساۋلىعىمىز ءۇشىن. بۇگىندە الماتىدا 400 ادام 83 مىڭ تەڭگە ايىپپۇل تولەيتىن بولدى. ەگەر ايىپپۇلدى ۋاقىتىندا تولەسە، بۇل سومانىڭ جارتىسىن عانا تولەيدى»،- دەدى اكىم. مۇنىڭ الدىندا قالانىڭ باس سانيتارلىق دارىگەرى جانداربەك بەكشين دە ءبىر اپتانىڭ ىشىندە تولەگەن ادامعا ايىپپۇل ەكى ەسە قىسقاراتىنىن ايتقان بولاتىن.