جىل سوڭىنا دەيىن سولتۇستىك وڭىرلەرگە 4,5 مىڭ ادام قونىستانادى

استانا. قازاقپارات - بۇگىن پرەمەر-ءمينيستردىڭ ورىنباسارى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا سولتۇستىك وڭىرلەرگە قونىس اۋداراتىنداردى قولداۋ شارالارى تۋرالى ايتتى، دەپ حابارلايدى قازاقپارات ءتىلشىسى.

«جۇمىس كۇشى كوپ وڭىرلەر مەن جۇمىس كۇشى جەتىسپەيتىن ايماقتار اراسىنداعى دەموگرافيالىق ايىرمانى تەڭەستىرۋ ءۇشىن ىشكى ۇتقىرلىقتى ىنتالاندىرۋ جۇمىستارى باستالدى. بيىل «سەرپىن»، «اۋىل اماناتى»، «اۋىل - ەل بەسىگى»، «ديپلوممەن اۋىلعا» سياقتى باعدارلامالار ارقىلى 33 مىڭنان استام ادامعا مەملەكەتتىك قولداۋ كورسەتىلەدى. بۇل ساناتتاعى ازاماتتاردى قولداۋ ءۇشىن ەكونوميكالىق ۇتقىرلىق سەرتيفيكاتى ەنگىزىلدى. كوشىپ كەلۋشىنىڭ جۇمىس بەرۋشى راستايتىن جۇمىس ورنى بولعان جاعدايدا، بۇل ازاماتقا تۇرعىن-ءۇي قۇنىنىڭ 50 پايىزى مولشەرىندە، ءبىراق 4 ميلليون تەڭگەدەن اسپايتىن سەرتيفيكات بەرىلەدى»، - دەدى ت. دۇيسەنوۆا ۇكىمەت وتىرىسىندا كوشى-قون ساياساتى تۇجىرىمداسىن ىسكە اسىرۋ بارىسىن تالقىلاۋ كەزىندە

وسى ورايدا مينيستر وسىنداي سەرتيفيكاتتى 224 وتباسى العانىن ايتتى.

«ەكونوميكالىق ۇتقىرلىق سەرتيفيكاتتارىن بەرۋدىڭ وڭ ناتيجەسى ءقازىردىڭ وزىندە بايقالىپ وتىر. جىل سوڭىنا دەيىن سولتۇستىك وڭىرلەرگە تاعى 4512 ادامدى (قونىس اۋدارۋشىلار مەن قانداستار) قونىستاندىرۋدى جوسپارلاپ وتىرمىز»، - دەدى ۆەدومستۆو باسشىسى.

بۇدان بۇرىن حابارلانعانداي، قازاقستانعا نەگىزىنەن قاي ەلدىڭ ازاماتتارى قونىس اۋدارىپ جاتقانى انىقتالدى.