شارىن ۇلتتىق پاركىندە ءتۋريزمدى دامىتۋعا 4,5 ميلليارد تەڭگە ينۆەستيتسيا تارتىلدى
بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ەرەكشە قورعالاتىن تابيعي اۋماقتار باسقارماسىنىڭ باسشىسى ەرقۇلان دۇيسەكەيەۆ ءمالىم ەتتى، دەپ حابارلايدى قازاقپارات ءتىلشىسى.
«QazaqGeography» رەسپۋبليكالىق قوعامدىق بىرلەستىگىنە قاراستى «تاۋنتون پليۋس» كونسورتسيۋمىنە شارىن ۇلتتىق پاركى اۋماعىنان جەر ۋچاسكەسى بەرىلدى. ينۆەستيتسيانىڭ كولەمى 4,5 ميلليارد تەڭگەنى قۇرايدى. كەلىسىمشارتقا سايكەس ينۆەستور ساپار ورتالىعىن، 2 گلەمپينگ، ەكو قوناقۇيلەر، قىزمەتكەرلەرگە ارنالعان جاتاقحانا، كاراۆانينگ، قازاق اۋىلىن، بالالارعا ارنالعان الاڭدار سالۋ جوسپارلانىپ وتىر. ودان بولەك، مەيرامحانا، كوشپەلى تاماقتانۋ ورىندارى، كەمپينگ جانە شارىن وزەنى بويىنان وتەتىن كوپىرلەر سالۋ دا جوسپاردا بار»، - دەدى ەرقۇلان دۇيسەكەيەۆ ەلوردادا وتكەن «ۇلتتىق پاركتەر: ەكولوگيالىق ءتۋريزمنىڭ جاڭا مودەلى» اتتى دوڭگەلەك ۇستەل وتىرىسىندا.
سونداي- اق مينيسترلىك وكىلى اتالعان ۇلتتىق پارك اۋماعىندا شولۋ الاڭى مەن سۋبۇرقاقتار بولاتىنىن ايتىپ وتىر.
«كەلۋشىلەرگە ارنالعان اقپاراتتىق تابلو، قوقىس كونتەينەرلەرى مەن دەمالىس ورىندىقتارىن قويۋ قاراستىرىلىپ وتىر. سونىمەن قاتار ۇيالى بايلانىس انتەنناسى مەن مەتەوستانسا ورناتىلادى. بۇگىندە ينۆەستور ەلەكتر قۋاتى جەلىسىن تارتۋ بويىنشا جوبا ازىرلەپ جاتىر. ياعني كەگەن اۋدانىنا قاراستى ۇزىنبۇلاق اۋىلىنان شارىن شاتقالىنا دەيىن 40 شاقىرىم جەرگە جارىق تارتىلادى. سول سياقتى سارىبۇلاق اۋىلىنان شاتقالعا دەيىن 15 شاقىرىم جەرگە ەلەكتر جەلىسى جەتكىزىلەدى»، - دەيدى ول.
ايتا كەتسەك، بۇگىن ەلوردادا «Qazaqstan Live Fest - 2022» اتتى حالىقارالىق كورمە اشىلدى. ءۇش كۇنگە سوزىلاتىن شارانى استانا تۇرعىندارى مەن قوناقتارى تەگىن تاماشالاي الادى. تۋريزم، سپورت جانە بەلسەندى ءومىر سالتى تاقىرىبىنا ارنالعان شارا ەكسپو اۋماعىنداعى حالىقارالىق كورمە ورتالىعىندا ءوتىپ جاتىر.
اۆتور: ءالي يبرايەۆ