قىتايدا تولاسسىز جاۋعان جاڭبىردان 4 ادام قازا تاۋىپ، 48 ادام ءىز-ءتۇزسىز جوعالىپ كەتتى
15:50, 30 - تامىز 2023
بەيجىڭ. قازاقپارات - سىچۋان پروۆينتسياسىنداعى (وڭتۇستىك-باتىس قىتاي) قۇرىلىس الاڭىندا سۋ تاسقىنى سالدارىنان ءتورت ادام قازا تاۋىپ، 48 ادام ءىز-ءتۇزسىز جوعالىپ كەتتى.
بۇل تۋرالى سارسەنبى كۇنى شينحۋا اگەنتتىگى ءمالىم ەتتى، دەپ حابارلايدى قازاقپارات.
وقيعا 21- تامىزدا سىچۋان پروۆينتسياسىنىڭ تسزينيان ۋەزىندە بولعان. تولاسسىز جاۋعان جاڭبىر تاس جولدىڭ قۇرىلىس الاڭىندا تاۋ تاسقىنىنا ۇلاسقان. توتەنشە جاعداي كەزىندە نىساندا 201 ادام بولسا، ونىڭ 149 ى قۇتقارىلدى.
قازىر ىزدەستىرۋ-قۇتقارۋ جۇمىستارى جالعاسىپ جاتىر. پوليتسيا قۇرىلىس كومپانياسىنىڭ بەس قىزمەتكەرىن ۇستادى. ولار ەڭبەك قاۋىپسىزدىگى نورمالارىن بۇزدى جانە وقيعا تۋرالى جالعان اقپارات بەردى نەمەسە ۇسىنبادى دەگەن كۇدىكپەن ۇستالعان.