ق. كوشەربايەۆ: ارال تەڭىزىنىڭ سۋ دەڭگەيى 4 مەترگە كوتەرىلىپ، ەكسپورتقا بالىق شىعارۋ 3,6 ەسەگە ءوستى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە قىزىلوردا وبلىسىنىڭ اكىمى قىرىمبەك كوشەربايەۆ ءمالىم ەتتى.
«وزدەرىڭىزدە بىلەتىندەي، كەزىندە نۇرسۇلتان ءابىش ۇلى باستاماسىمەن تاۋەلسىزدىكتىڭ العاشقى جىلدارىندا ارال ماڭى ەلدەرى باسشىلارى قىزىلوردادا باس قوسىپ، ارنايى قور قۇرعان بولاتىن. ءبىراق، ءبىزدىڭ كورشىلەرىمىز بۇل تۇرعىدا ورنىنان قوزعالعان ەمەس. تەك قازاقستان عانا پرەزيدەنتىمىزدىڭ تاپسىرماسىمەن دۇنيەجۇزىلىك بانكپەن كەلىسىم جاساسىپ، سولتۇستىك ارال جوباسىنىڭ ءبىرىنشى كەزەڭىن جۇزەگە اسىردىق»، - دەدى وبلىس باسشىسى.
ونىڭ اتاپ وتۋىنشە، قولعا الىنعان جۇمىستاردىڭ ناتيجەسىندە بۇگىنگى كۇنى ارال تەڭىزىنىڭ سۋ دەڭگەيى 38 دەن 42 مەترگە دەيىن كوتەرىلدى.
«ارينە، تەڭىزدى بۇكىلىمەن ساقتاپ قالۋ مۇمكىن ەمەس. ءبىز تەك سولتۇستىك بولىگىن عانا ايتىپ وتىرمىز. سۋ كولەمى 15 تەن 27 مىڭ شاقىرىم تەكشەگە كوبەيدى. سۋدىڭ مينەرالدانۋى ليترىنە 23 تەن 13 گرامعا دەيىن تومەندەدى»، - دەدى ول.
سونىمەن قاتار ول ەلىمىزدىڭ تاراپىنان ناقتى شارالار جۇرگىزىلمەگەندە ارالدىڭ ءولى تەڭىزگە اينالۋ قاۋپى وتە جوعارى بولعاندىعىن ايتتى.
«ول كەزدە تەڭىز ءوز جاعالاۋىنان 94 شاقىرىمعا كەرى شەگىنگەن ەدى. تاياۋدا عانا ۇشاقپەن قاراپ شىقتىم، تەڭىز جاعالاۋى ارال قالاسىنا دەيىن 17 شاقىرىم قالدى»، - دەدى وبلىس باسشىسى.
سونداي-اق، ارال بالىعىن ەكسپورتقا شىعارۋ 3,6 ەسەگە ءوستى.
«ارال تەڭىزىنەن بالىق الۋ كولەمى 20 ەسەگە ءوسىپ وتىر. بۇرىن بالىق وڭدەيتىن 3 زاۋىت بولسا، قازىرگى ۋاقىتتا ولاردىڭ سانى 8 گە جەتتى. بۇگىندە كوكسەركە بالىعىن بريۋسسەلگە جەتكىزۋدەمىز. ەۋروكودتا الدىق، 400 جۇمىس ورنىن قامتاماسىز ەتتىك»، - دەدى ول.
ونىڭ ايتۋىنشا، بۇگىندە جىل سايىن 11 مىڭ توننا ارال بالىعى وڭدەلەدى.
«بالقاش، قاپشاعايعا جانە باسقا دا جاققا كەتىپ قالعان بالىقشىلاردىڭ بارلىعى دا ارالعا قايتىپ كەلدى. ەكسپورت كولەمى 3,6 ەسەگە ءوستى. ارال تەڭىزىندە بالىقتىڭ 22 ءتۇرى ورالدى»، - دەدى ق. كوشەربايەۆ.