قازاقستاندا 4 ايدا كوروناۆيرۋس پەن پنيەۆمونيادان 150 مىڭ ادام ەمدەلدى
بۇل تۋرالى «الەۋمەتتىك مەديتسينالىق ساقتاندىرۋ قورى» ك ە ا ق باسقارما ءتوراعاسى بولات توكەجانوۆ ايتىپ بەردى، دەپ حابارلايدى قازاقپارات ءتىلشىسى.
«ناۋرىز- ماۋسىم ايلارىندا ەلىمىزدىڭ ستاتسيونارلارىندا 150 مىڭ ادام كوروناۆيرۋس پەن پنيەۆمونيادان ەمدەلدى. ناۋرىز ايىنا قاراعاندا، ماۋسىمدا ءبىر كۇندىك توسەك- ورىندارمەن ناۋقاستاردىڭ قامتىلۋى - 8 ەسەگە، جۇقپالى اۋرۋلار اۋرۋحاناسىنداعى توسەك- ورىننىڭ قامتىلۋى - 23 ەسەگە وسكەنىن اتاپ وتكەن ءجون. سونداي- اق، پروۆيزورلىق ستاتسيونارلاردا ءبىر كۇندىك توسەك- ورىن سانى ناۋرىز ايىندا 21 مىڭ بولسا، قازىر 100 مىڭنان استى»، - دەدى سپيكەر ورتالىق كوممۋنيكاتسيالار قىزمەتىندە وتكەن ونلاين- بريفينگتە.
اتالعان قور قازاقستاندىقتارعا مەديتسينالىق كومەك كورسەتۋ ساپاسىن جاقسارتۋ ءۇشىن شىلدە ايىندا مەديتسينالىق ۇيىمدارعا ارنالعان تاريفتەردى ارتتىرعان.
«ەندى پروۆيزورلىق ستاتسيوناردا ءاربىر توسەك- ورىن كۇنى ءۇشىن - 22 مىڭ تەڭگەدەن استام، تاۋلىك بويعى ستاتسيونارلاردا بولعانى ءۇشىن - 32 مىڭ تەڭگەدەن استام، ناۋقاستى انەستەزيولوگيا، رەانيماتسيا جانە قارقىندى تەراپيا بولىمشەسىندە ەمدەۋدەگى توسەك- ورىن كۇنى ءۇشىن - 70 مىڭ تەڭگەدەن استام قاراجات قور تاراپىنان وتەلەدى. اتالعان قىزمەتتەرگە ءتاريفتى كوتەرۋ قور جەتكىزۋشىلەرىنىڭ سانىن كوبەيتۋگە، جەكە اۋرۋحانالاردى بەلسەندى تارتۋعا جانە كوروناۆيرۋستىق پنيەۆمونياسى بار ناۋقاستاردى ەمدەۋگە مۇمكىندىك بەرەدى»، - دەدى قور باسشىسى.
بۇعان دەيىن بولات توكەجانوۆ كوروناۆيرۋسقا قارسى كۇرەس شارالارىنا 56,7 ميلليارد تەڭگە بولىنگەنىن ايتتى. سونىمەن بىرگە، كوروناۆيرۋستىق ينفەكسيانىڭ جەڭىل دەڭگەيىندەگى ءبىر ناۋقاسقا - 292600 تەڭگە، ورتاشا دەڭگەيدەگى ناۋقاسقا - 446100 تەڭگە، اۋىر ناۋقاستى ەمدەۋگە - 1,5 ميلليون تەڭگە تاريف بەكىتىلگەن.