ءبىز - كۇن پەرزەنتىمىز: اقتاۋدا 3-حالىقارالىق بالالار بايقاۋى باستالدى

اقتاۋ. قازاقپارات - اقتاۋدا «ءبىز - كۇن پەرزەنتىمىز» اتتى Ⅲ حالىقارالىق بالالار شىعارماشىلىعىنا ارنالعان فەستيۆال-بايقاۋ باستالدى، دەپ حابارلايدى قازاقپارات ءتىلشىسى.

«ءبىز - كۇن پەرزەنتىمىز» Ⅲ حالىقارالىق بايقاۋىنا بولگاريا، وزبەكستان، ارمەنيا، قىرعىزستان جانە قىتاي ەلىنەن كەلگەن 220 ونەرپاز قاتىسادى. ال «حالىقتىق ورىنداۋ» نوميناتسياسىندا ونەر كورسەتۋ ءۇشىن ەلىمىزدىڭ تۇكپىر-تۇكپىرىنەن 20 دان استام ونەرپاز كەلدى.

«6 جاسىمنان باستاپ دومبىرا تارتىپ، ءارتۇرلى رەسپۋبليكالىق جانە حالىقارالىق بايقاۋلارعا قاتىسىپ ءجۇرمىن. بۇل فەستيۆالعا 3 اي دايىندالدىم. جۇلدەلى ورىن الاتىنىما سەنىمدىمىن»، - دەدى قىزىلوردالىق ونەرپاز شىڭعىس التاي ۇلى.

«حالىقتىق ورىنداۋ» نوميناتسياسى بويىنشا قاتىسۋشىلاردىڭ ءارقايسىسى ەكى تۋىندى ورىنداۋ قاجەت.

قازىلار القاسى ءار نوميناتسيا جانە جاس ساناتى بويىنشا ونەرپازدى 10 بالدىق جۇيە بويىنشا باعالايدى.

«بۇل حالىقارالىق فەستيۆال وڭىرىمىزدە ءۇشىنشى رەت وتكىزىلىپ جاتىر. ءبىرىنشى فەستيۆالدىڭ اشىلۋى 2007-جىلى تامىزدا ايىندا وتكىزىلسە، ەكىنشىسى 2010-جىلى ۇيىمداستىرىلعان. بايقاۋدىڭ باستى ماقساتى - بالالاردىڭ ونەرگە دەگەن قىزىعۋشىلىعىن ارتتىرۋ، ونەرپازدار اراسىنداعى دوستىقتى نىعايتۋ»، - دەدى اقتاۋ قالالىق مادەنيەت، دەنە شىنىقتىرۋ جانە سپورت ءبولىمىنىڭ باسشىسى امانتاي كۋمبايەۆ.