كانار ارالدارىنداعى ءورت: 3 مىڭنان استام ادام ەۆاكۋاتسيالاندى

تەنەريفە. قازاقپارات - بەيسەنبىدە ءورت سوندىرۋشىلەر يسپانيانىڭ تەنەريفە ارالىنداعى ۇلتتىق ساياباقتا ىستىق، قۇرعاق اۋا رايىندا شىققان ورمان ءورتىن توقتاتۋ ءۇشىن كۇرەستى.

كۇنى بويى 3000 نان استام ادام ەۆاكۋاتسيالاندى. تەنەريفەدەگى ءورت سوڭعى 40 جىلداعى كانار ارالدارىنداعى ەڭ كۇردەلى ءورت بولىپ وتىر، دەپ حابارلايدى قازاقپارات Reuters كە سىلتەمە جاساپ.

ارالدا دەمالىس كۇندەرى اۋا تەمپەراتۋراسى كوتەرىلۋى مۇمكىن. جەل باعىتىنىڭ وزگەرۋىنە بايلانىستى ءورت سەنبى كۇنى تاڭەرتەڭ سولتۇستىك- شىعىستان تەنەريفەنىڭ باتىسىنا قاراي جىلجۋى مۇمكىن.

ارالدىڭ اپاتتىق- قۇتقارۋ قىزمەتىنىڭ جەتەكشىسى پەدرو مارتينەستىڭ ايتۋىنشا، ءورتتىڭ تارالۋى باياۋلاعان. ءتۇنى بويى 200 گە جۋىق ءورت ءسوندىرۋشى جۇمىس ىستەيدى.

«كوشەگە شىققاندا تۇنشىعا باستايسىز. تاماعىڭىزعا بىردەڭە تۇرىپ قالعانداي»، - دەدى لا- ەسپەرانسا اۋىلىنىڭ تۇرعىنى 37 جاستاعى البا حيل.

بيلىك جەرگىلىكتى تۇرعىنداردى ۇيدەن شىقپاۋعا شاقىردى.

سارسەنبىدە باستالعان ءورت كەم دەگەندە 3273 گەكتار جەردى شارپىدى.

وسى جازدا اپتاپ ىستىق پەن قۇرعاق اۋا رايى ەۋروپا مەن كانادانىڭ باتىسىندا قاتتى ورمان ورتتەرىن تۇتاندىردى. گاۆايدەگى ماۋي ارالى دا كەم دەگەندە 106 ادامنىڭ ءومىرىن قيعان ورمان ورتىنەن زارداپ شەكتى، ونداعان مىڭ ادام ەۆاكۋاتسيالانۋعا ءماجبۇر بولدى جانە تاريحي لاحاينا كۋرورتتىق قالاسى جويىلدى.

عالىمداردىڭ ايتۋىنشا، مۇنىڭ ءبارى كليماتتىڭ وزگەرۋىنەن بولىپ جاتىر.

ءورتتى سوندىرۋگە 17 ۇشاق، 350 ءورت ءسوندىرۋشى مەن اسكەري قىزمەتشى تارتىلدى.

ەكى تەنەريفە اۋەجايى قالىپتى جۇمىس ىستەپ جاتىر.