بالاڭىزبەن ءتىل تابىسۋعا كومەكتەسەتىن قاراپايىم 3 ارەكەت

استانا. قازاقپارات - كەز كەلگەن اتا-انا باعىپ-قاعىپ وتىرعان بالاسىنىڭ باقىتتى بولعانىن قالايتىنى ءسوزسىز. وعان ءوزارا بايلانىستارىڭىز ىقپال ەتەدى.

اتا-انا مەن بالا اراسىنداعى قارىم-قاتىناستى نىعايتۋعا قاتىستى بىرنەشە كەڭەستەر ۇسىنامىز.

سويلەسۋ

كەي اتا-انالار بالا ەر جەتكەن سوڭ عانا ونىمەن سويلەسۋ كەرەك دەپ ويلايدى. الايدا ءسابي كەزىنەن تىلدەسۋدى ادەتكە اينالدىرعان ابزال. ىشتە جاتقان كەزىنەن نارەستەڭىزبەن سويلەسسەڭىز، بوبەگىڭىزدى قولعا العاننان كەيىن دە جاقىن بايلانىس ورناتىپ الاسىز. وسىلايشا ءسىز بالاڭىزدى ەرتە كەزدەن تىڭداپ، ونىمەن ساناسىپ ۇيرەنەسىز. مۇنى جاستايىنان كورگەن ۇل- قىزىڭىز سىزگە ويىن بىلدىرۋدەن تايسالمايدى، پىكىرىن اشىق ايتۋدان جاسقانبايدى. ومىردە بولاتىن ءتۇرلى سيتۋاتسيالاردا سىرتتان جاناشىر ىزدەمەي، سىزبەن كەڭەسەتىن بولماق.

بالانىڭ اتا-انامەن سويلەسە العانى اراداعى قارىم- قاتىناستىڭ ەركىن بولۋىنا اسەر ەتەدى. مۇنداي جەڭىل قارىم-قاتىناس بولاشاقتا ماڭىزدى شەشىم قابىلدار كەزدە دە بالانىڭ تاڭداۋ جاساۋىنا پايداسىن تيگىزەدى.

قولداۋ

ءار بالا كىشكەنتاي كەزىنەن باستاپ ءتۇرلى نارسەگە اۋەس بولادى. ءبىرى سۋرەت سالۋدى ۇناتسا، ەندى ءبىرى ءان ايتقانداي جاقسى كورەدى. كەيبىرى، ءتىپتى، ويىنشىقتارىنان ءتۇرلى رولدەگى كەيىپكەرلەردى قۇراستىرىپ وتىرادى. مۇنىڭ بارىنە بەي-جاي قاراماۋ كەرەك نەمەسە ازىلگە اينالدىرماعان ءجون. ويتكەنى كوپ ادام بولاشاقتا كىم بولاتىنىن ءسابي كەزىنەن بىلدىرەدى ەكەن. وسىنداي قىزىعۋشىلىقتارىنا ءمان بەرسەڭىز، بالاڭىزدىڭ ارمانىنا جەتۋىنە دە سەبەپشى بولۋىڭىز مۇمكىن.

قاي ۋاقىتتا دا بالا ەڭ ءبىرىنشى اتا-اناسىنان قولداۋ كۇتەدى. وزگەلەرگە كۇلكىلى كورىنەتىن ارەكەتتەرىن، وي- تىلەگىن ۇيىندەگى جاناشىرلارى دەمەپ جىبەرسە، بالا شاتتانىپ، شابىتتانادى. ءوزىنىڭ دۇرىس جولدا ەكەنىن ءتۇسىنىپ، ءارى قاراي ەڭبەكتەنە تۇسەدى. ەندەشە بالاڭىزدىڭ قىزىعۋشىلىعىنا بەي-جاي قاراماي، ونى قولداۋعا تىرىسىڭىز.

سەنۋ

اتا-انا مەن بالانىڭ اراسىندا شىنايى قارىم-قاتىناس ورناۋى ءۇشىن سويلەسۋ مەن قولداۋدان بولەك، سەنىم دە ماڭىزدى ءرول اتقارادى. ومىردە ءتۇرلى سيتۋاتسيا بولادى. ماسەلەن، مەكتەپتە بالاڭىزدى ىستەمەگەن ىسىنە ايىپتاپ جاتسا، ءسىزدىڭ ەڭ ءبىرىنشى رەاكتسياڭىز قالاي بولادى؟ بىردەن قىزبالانىپ، بالاڭىزعا اشۋلاناسىز با؟ سول ساتتە مۇعالىممەن بىرگە بالاڭىزعا ۇرساسىز با؟ وزگەلەردىڭ كوزىنشە ونىڭ ءسوزىن تىڭداماي، ۇلكەندەرگە قوسىلىپ كەتەسىز بە؟

ارينە، مىنا قويىلعان سۇراقتارعا «ءيا» دەسەڭىز، وندا بالاڭىزبەن اراداعى بايلانىستى قۇرتىپ جاتىرمىن دەپ ويلاي بەرىڭىز. ولاي بولعانىن قالاماساڭىز، مۇندايدا سالقىنقاندى بولۋىڭىز كەرەك. ماسەلەنىڭ بايىبىنا بارۋ ءۇشىن بالاڭىزبەن سويلەسىپ الىڭىز. ونىڭ ەش كىناسى جوق ەكەنىن بىلسەڭىز، ايقاي-شۋدى ەرەسەكتەرمەن بىرلەسىپ توقتاتۋعا بولادى. مىنە، بالاعا سەنىم ارتۋ، ونى تىڭداۋ ارقىلى كوپ كەدەرگىدەن قۇتىلاسىز. ەڭ باستىسى، بالاڭىزبەن اراداعى قارىم-قاتىناستى نىعايتاسىز ءارى ءبىر-بىرىڭىزگە سەنىمدەرىڭىز ارتا تۇسەدى.

ءسىزدىڭ وعان سەنگەنىڭىز عانا ەمەس، بالانىڭ دا سىزگە سەنىمى مىعىم بولۋىنا نازار سالىڭىز. الداماڭىز. ۋادە بەرىپ، ورىنداماي كەتپەڭىز. كەيدە كىشكەنتاي بىلىنەر-بىلىنبەس وتىرىكتىڭ ءوزى بالانىڭ جادىندا ماڭگىگە ساقتالىپ قالادى. سول ءۇشىن نارەستە كەزىنەن شىنايى ەركىن بايلانىس ورناتۋعا تىرىسىڭىز.

P. S. بۇل كەڭەستەر قاراپايىم كورىنگەنىمەن، وتباسى تىنىشتىعىن ساقتايتىن كىلت دەسەك تە بولادى. كادەڭىزگە جاراسىن!