ءبىر وتباسىدان 3 ۇرپاق وكىلدەرى داۋىس بەردى
جىگەرباي قاجىعاليەۆتىڭ ايتۋىنشا، بۇگىنگى سايلاۋدا ءبىر وتباسىدان ءۇش ۇرپاق وكىلدەرى ءوز تاڭداۋلارىن جاسادى.
ونىڭ سوزىنە قاراعاندا، ءوزىنىڭ جاسى 76 دا بولسا، زايىبى ءمارۋا 75 تە. ۇلى ورازباي 55 تە، كەلىنى مارجان 50 دە، قىزدارى گۇلسانا، گۇلجانات، گۇلميرا دا سولار قاتارلاس. وعان قوسا نەمەرەلەرى ەرنار مەن دانا دا داۋىس بەردى.
بارلىعى ءۇش ۇل، ءۇش قىزدان تاراعان 14 نەمەرە، 14 شوبەرە كورىپ وتىرعان، ەڭبەك جولىندا ۇستازدىق ەتۋمەن قاتار اۋىلدىق وكرۋگ اكىمى قىزمەتىن دە اتقارعان جىگەرباي قاريا - بۇگىندە اۋداندىق ارداگەرلەر كەڭەسىنىڭ ءتوراعاسى.
«ءبىزدىڭ وتباسىمىزدا دەموكراتيالىق ءۇردىس ورنىققان دەپ ايتۋعا بولادى. داۋسىڭدى اناعان بەر، مىناعان بەر دەپ ايتقان ەمەسپىز. اركىم ءوز تاڭداۋىن جاسادى. ەڭ باستىسى، بىزگە قازاقستانىمىزدىڭ قارىشتاپ دامىعانى كەرەك. ەلدىڭ ىشكى جانە سىرتقى ساياساتى دۇرىس بولىپ، الەمدەگى الدىڭعى قاتارلى مەملەكەتتەرمەن يىق تەڭەستىرسەك، ودان ارتىق ابىروي جوق»، دەدى قازاقپارات تىلشىسىنە جىگەرباي قاجىعاليەۆ.
ەسكە سالا كەتەيىك، بۇدان بۇرىن ەلدىڭ باتىسىندا تۇرعىندار سايلاۋدا ءوز تاڭداۋىن جاساپ جاتقانىن جازعان بولاتىنبىز.
باتىس قازاقستان وبلىسىندا 70 جاستاعى قاريا ءوز تاڭداۋىن جاسادى.