اقمولا وبلىسىندا كۇن رايىنىڭ بۇزىلۋىنان 3 اۆتوجول جابىلدى

استانا. قازاقپارات - اقمولا وبلىسىندا اۋا رايىنىڭ بۇزىلۋىنا بايلانىستى بىرنەشە اۆتوجول ۋچاسكەسى جابىلدى، دەپ حابارلايدى قازاقپارات «قازاۆتوجول» كومپانياسىنا سىلتەمە جاساپ.

«ەلوردا ۋاقىتىمەن ساعات 23.30 دان باستاپ اۋا رايىنىڭ قولايسىزدىعىنا بايلانىستى اقمولا وبلىسىندا كولىكتىڭ بارلىق ءتۇرى ءۇشىن تومەندە كورسەتىلگەن جول ۋچاسكەلەرىندە قوزعالىسقا شەكتەۋ ەنگىزىلدى:

1) «جاقسى- ەسىل- بۇزىلىق» اۆتوجولىنىڭ 0-82 شاقىرىم ارالىعى؛

2) «جەزقازعان- پەتروپاۆل» اۆتوجولىنىڭ 537-552 شاقىرىم ارالىعى؛

3) «قوستاناي- اۋليەكول- سۇرعان» اۆتوجولىنىڭ 232-260 شق ارالىعى»، - دەلىنگەن حابارلامادا.

تراسسالارعا «قازاۆتوجول» ۇ ك» ا ق اقمولا وبلىستىق فيليالىنىڭ 72 ارنايى تەحنيكاسى جۇمىلدىردى.

ەسكە سالايىق، سينوپتيكتەر اۋا رايىنىڭ بۇزىلۋىنا بايلانىستى 14 وڭىردە ەسكەرتۋ جاريالاعان بولاتىن.

اقمولا وبلىسىنىڭ باسىم بولىگىندە جاڭبىر مەن قار تۇرىندە جاۋىن- شاشىن ءتۇسىپ، بۇرقاسىن كۇتىلەدى. وبلىستىڭ باتىسىندا، سولتۇستىگىندە، وڭتۇستىك- شىعىسىندا تۇمان، كوكتايعاق بولادى. جەلدىڭ كۇشى كەي ۋاقىتتا 23 م/س جەتۋى مۇمكىن.