پرەزيدەنتتىككە كانديداتتار تولەيتىن 3 ميلليون تەڭگە جارنا قايتارىلا ما
«ق ر سايلاۋ تۋرالى كونستيتۋتسيالىق زاڭىنا سايكەس پرەزيدەنتتىككە كانديداتتار ورتالىق سايلاۋ كوميسسياسىنىڭ شوتىنا جارنا اۋدارۋى ءتيىس. جارنانىڭ مولشەرى زاڭ بويىنشا بەلگىلەنگەن ەڭ تومەنگى جالاقى ەسەبىمەن 50 ا ە ك كولەمىندە. ەگەر كانديدات سايلاۋدىڭ قورىتىندىسى بويىنشا ق ر پرەزيدەنتى بولىپ سايلانسا نەمەسە كانديدات سايلاۋدا كەمىندە 5 پايىز داۋىس جيناسا، سونداي- اق كانديدات قايتىس بولعان جاعدايدا جارنا كەرى قايتارىلادى»، - دەدى ورتالىق سايلاۋ كوميسسياسىنىڭ مۇشەسى سابيلا مۇستافينا.
ونىڭ ايتۋىنشا، باسقا جاعدايدا جارنا رەسپۋبليكالىق بيۋدجەتكە جىبەرىلەدى.
ايتا كەتسەك، بۇعان دەيىن پرەزيدەنتتىككە كانديداتتار 3 ميلليون تەڭگە جارنا تولەيتىنى تۋرالى حابارلاعان ەدىك. ياعني كانديدات وتىنىشپەن قاتار سايلاۋ جارناسىن تولەگەنىن راستايتىن تۇبىرتەكتى وتكىزۋى ءتيىس.
ەسكە سالساق، بۇگىن پرەزيدەنت سايلاۋىنا كانديداتتاردى ۇسىنۋ باستالدى.
اۆتور
داۋلەت ىزتىلەۋ