بەرىك ءابدىعالي ۇلى پرەزيدەنتتىڭ الدىندا كوتەرەتىن ۇلىتاۋدىڭ 3 نەگىزگى ماسەلەسىن اتادى
ايماق باسشىسى بەرىك ءادىعالي ۇلى قازاقپارات تىلشىسىنە بەرگەن سۇحباتىندا ۇلىتاۋ وڭىرىندە ءبىرىنشى كەزەكتە قولعا الىناتىن نەگىزگى شارۋالاردى اتادى.
«ەرتەڭ وڭىرگە مەملەكەت باسشىسى دا كەلگەلى وتىر. سول كەزدە پرەزيدەنتتىڭ الدىندا كوتەرەتىن ەڭ ۇلكەن ماسەلە - قىزىلوردا-جەزقازعان جولىن سوزباي، تەزدەتىپ باستاپ، ءبىتىرۋ. ويتكەنى باعانىڭ وزگەرۋىنە بايلانىستى جوبانى قايتا قاراعىلارى كەلىپ، ءوز تاراپتارىنان جۇمىس ىستەپ جاتىر. ەكىنشىدەن، ەكولوگيا ماسەلەسى بار. وسى ماسەلەنى كوتەرگىمىز كەلىپ وتىر. ءبىز ارال وڭىرىنە كىرەمىز، سودان كەيىن گەپتيل ماسەلەسى بار. ەكولوگيالىق زارداپتار دالەلدەنسە، قوسىمشا الەۋمەتتىك كومەك كوبەيەدى. بۇل ۇلكەن قولداۋ بولادى. ۇشىنشىدەن، جەزعازعان قالاسىنىڭ، جالپى ءوڭىردىڭ اۋىزسۋ ماسەلەسى بار. بىزدە ينفراقۇرىلىمدار ابدەن توزعان. جاڭاارقا، ساتپايەۆ، ۇلىتاۋ، جەزقازعان - بارىندە دە كارىز جۇيەسى، سۋ قۇبىرلارى ابدەن توزعان. وسىنىڭ ءبارىن ۇكىمەتتىڭ قولداۋىمەن، «قازاقمىس» كوروپوراتسياسى بار، بىرىگىپ، تەز ارادا شەشۋدى نەگىزگى مىندەت دەپ توپشىلاپ وتىرمىز»، - دەدى وبلىس اكىمى.
سونداي-اق، بەرىك ءابدىعالي ۇلى قايتا قۇرىلعان ءوڭىردى تۇلەتۋ ءۇشىن قوسىمشا قاراجات كەرەك ەكەنىن جەتكىزدى. ءوڭىردىڭ جەر قويناۋىن يگەرىپ وتىرعان ونەركاسىپ الپاۋىتتارىنان دا دەمەشۋىلىك قارجى تارتۋ كوزدەلىپ وتىرعان كورىنەدى.
«ارينە ودان باسقا دا جوبالار بار. قازىر حالىق سانىنىڭ وسكەنىنە بايلانىستى تۇرعىن ءۇي ماسلەسىن شەشۋ كەرەك بولادى. قاراجالدا جول ماسەلەسى، جاڭاارقادا جاڭا كاسىپتەر اشۋ، ۇلىتاۋداعى سۋ، ەلەكتر پروبلەمالارى - قازىرگى تاڭدا ەڭ العاشقى كەزەكتە تۇر. قوسىمشا قاراجات سۇرايمىز، ارينە. ويتكەنى بۇل ءبىر جىلدا عانا شەشىلەتىن ماسەلەلەر ەمەس، الداعى 2-3 جىلدا ىستەلەتىن جۇمىس. سوندىقتان ءبىز ونىڭ ءبارىن جوسپارلاپ، دالەلدەپ، نەگىزدەيمىز. دەمەۋشىلىك قولداۋ دا بار. «قازاقمىس»، «قازتسينك، «ارسەلور ميتتال» دەگەن مەكەمەلەر بار. ولارمەن دە جۇمىس ىستەيمىز»، - دەدى ۇلىتاۋ وبلىسىنىڭ اكىمى.
ايتا كەتەيىك، وسى اپتادا پرەزيدەنت قاسىم-جومارت توقايەۆتىڭ ۇلىتاۋ، پەتەربور، تەگەرانعا باراتىنى حابارلاعان بولاتىن.