قازاقستان 3 ەلمەن بىرلەسىپ كاسپي ارقىلى جۇك تاسيتىن بىرلەسكەن كاسىپورىن قۇرماق
بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ۇكىمەت وتىرىسىندا ءمالىم ەتتى.
«ءبىز، ەكسپورتتىق جانە ترانزيتتىك جۇكتەردى تاسىمالداۋ ءۇشىن بالامالى باعدارلار مەن دالىزدەردى پىسىقتادىق. مينيسترلىك جۇكتەردى جەتكىزۋدىڭ لوگيستيكالىق تىزبەكتەرىنىڭ بۇزىلۋىن بولدىرماۋ بويىنشا جەدەل شارالار قابىلدادى. ەكسپورتتىق جۇكتەر لاتۆيا پورتتارىنا جانە ترانسكاسپي حالىقارالىق كولىك باعدارىنا باعىتتالادى. ترانسكاسپي باعدارى شەڭبەرىندە ازەربايجان، گرۋزيا جانە تۇركيا ەلدەرىمەن بىرلەسكەن كاسىپورىن قۇرۋ تۋرالى كەلىسىمگە قول جەتكىزىلدى»، - دەگەن مينيستر «اقتاۋ تەڭىز پورتى» ارنايى ەكونوميكالىق ايماعىندا «كونتەينەرلىك حاب» قۇرۋ جوسپارلانىپ وتىرعانىن جەتكىزدى.
«وسى جوبانى ىسكە اسىرۋ ءۇشىن سينگاپۋرلىق PSA International كومپانياسىمەن كەلىسسوزدەر جۇرگىزىلدى. سونىمەن قاتار Maersk, MSC جانە Cosco Shipping سياقتى الەمدىك كونتەينەرلىك وپەراتورلارىنىڭ پاركىن تارتۋ كوزدەلۋدە. جەكە بيزنەستى تارتا وتىرىپ، ساۋدا فلوتىن 4 پاروممەن تولىقتىرۋ جوسپارلانۋدا. بيىل شامامەن 4 ميلليون توننا ەكسپورتتىق جۇكتى قايتا باعدارلاۋدى ەسكەرە وتىرىپ، اقتاۋ جانە قۇرىق تەڭىز پورتتارى ارقىلى تاسىمال كولەمىن 10 ميلليون تونناعا دەيىن جەتكىزۋ جوسپارلانۋدا»، - دەدى قايىربەك وسكەنبايەۆ.