اقمولا وبلىسىندا ورتتەن ءبىر وتباسىنىڭ 3 بالاسى كوز جۇمدى
«ۇيدە 1979 جانە 1981 -جىلعى اتا-انا مەن ولاردىڭ 2004، 2005، 2007، 2008 -جىلى تۋعان ۇلدارى مەن 2012 -جىلى تۋعان قىزىنان، جەتى ادامنان، تۇراتىن كوپبالالى وتباسى تۇرعان. اتباسارداعى №4-مامانداندىرىلعان ءورت ءسوندىرۋ ستانسياسىنا دەيىنگى قاشىقتىق 25 شاقىرىم. ءورت ءسوندىرۋ بولىمشەلەرى كەلگەنگە دەيىن، وتاعاسى 2004 جانە 2012 -جىلى تۋىلعان ەكى بالانى جانە ونىڭ ايەلىن امان قۇتقارىپ قالعان»، - دەپ اتاپ ءوتتى باسپا ءسوز قىزمەتى.
ت ج د مالىمەتى بويىنشا ءورت سالدارىنان ءۇيدىڭ توبە جابىندىسى قۇلاعان.
«ساعات 06: 40 تا ءورت اۋىزدىقتالىپ، ساعات 08:25 تە ءسوندىرىلدى. ءورت شىققان ورىننان ءۇش بالانىڭ دەنەسى تابىلدى»، - دەپ حابارلادى ت ج د.
ءورتتى سوندىرۋگە ت ج د- نىڭ 12 قىزمەتكەرى مەن 2 تەحنيكاسى، ەرىكتى ءورت ءسوندىرۋ قۇرالىمدارى -3 تەحنيكا جانە ءۇش ادام جۇمىلدىرىلدى. وقيعا ورنىندا اۋداندىق پوليتسيا ءبولىمىنىڭ جەدەل- تەرگەۋ توبىنىڭ كەزەكشىسى جۇمىس ىستەيدى.
«وتاعاسىنىڭ ايتۋىنشا، تاڭەرتەڭگى ساعات بەس شاماسىندا ۇلى ونى وياتىپ، ۆەراندا ورتەنىپ جاتقانىن ايتقان. ەر ادام ءۇيدىڭ تەرەزەسىن سىندىرىپ، ايەلى مەن ەكى بالاسىن شىعارىپ العان. ءورت تەز تاراعان، ويتكەنى ءۇي تەز تۇتاناتىن ماتەريالداردان سالىنعان. ءۇش بالانى قۇتقارۋ مۇمكىن بولمادى. ءورتتىڭ سەبەبى انىقتالۋدا، كوكشەتاۋ قالاسىنان ءورت سىناماسى زەرتحاناسىنا جىبەرىلدى»، - دەدى اقمولا ت ج د باسشىسىنىڭ مىندەتىن اتقارۋشى قانات دوسپايەۆ.