قازاقپارات كۇنتىزبەسى: 3- شىلدە
ەستە قالار وقيعالار
1903-جىلى قازاقستانداعى ورتا ءبىلىم مەكەمەلەرىنىڭ ءبىرى - سەمەي مۇعالىمدەر سەمينارياسى اشىلدى. وعان سەمەي، كەرەكۋ، وسكەمەن، قارقارالى جانە اقمولا ۋەزدەرىنەن 24 بالا قابىلدانعان. كەيىن توبىل، بارناۋل جانە جەتىسۋ وقۋشىلارى قابىلدانا باستادى. سەميناريانىڭ ءبىرىنشى ديرەكتورى - ا. بەلىي.
1960-جىلى قاراعاندىداعى مەتاللۋرگيا كومبيناتىندا تۇڭعىش دومنا پەشى ىسكە قوسىلدى جانە سول كۇنى قازاقستاننىڭ تۇڭعىش شويىنى الىندى. بۇل كۇن قازاقستان ماگنيتكاسىنىڭ دۇنيەگە كەلگەن كۇنى بولىپ سانالادى.
1995-جىلى قازاقستان رەسپۋبليكاسىنىڭ مەملەكەتتىك تاۋەلسىزدىگىنىڭ جاريالانۋىن ماڭگى ەستە قالدىرۋ، قوعامدى توپتاستىرۋ، گۋمانيزم، ۇلتارالىق تاتۋلىق، قازاقستاندىق پاتريوتيزم تاربيەلەۋ يدەيالارىن كوركەم بەينەلەۋ ماقساتىندا ق ر پرەزيدەنتى ن. نازاربايەۆتىڭ «الماتى قالاسىندا تاۋەلسىزدىك ەسكەرتكىشىن ورناتۋ تۋرالى» قاۋلىسى شىقتى.
2009-جىلى استانا قالاسىندا توبەسى جابىق 30 مىڭ ورىندىق جاڭا «استانا ارەنا» ستاديونى اشىلدى.
2013-جىلى نومينالى 500 تەڭگەلىك «الەمدىك جانە ءداستۇرلى دىندەر كوشباسشىلارى سەزىنە 10 جىل» ەسكەرتكىش كۇمىس تيىندار قولدانىسقا ەندى. مەتالدىڭ قۇرامى - Ag 925/ 31,1g، ديامەترى - 38,61 م م، دايىنداۋ ساپاسى - proof. تارالىمى - 3000.
2013-جىلى ارحەولوگتار اقمولا وبلىسى ساندىقتاۋ اۋدانىنىڭ بۇرىنعى سارقىراما مەكەنىنەن ءبىزدىڭ زامانىمىزعا دەيىنگى IV عاسىرعا تيەسىلى ءبىرقاتار بىرەگەي ەسكەرتكىشتەر تاپتى.
2015-جىلى تاتارستان استاناسى - قازان قالاسىنىڭ ورتالىق كوشەلەرىنىڭ بىرىنە قازاقستان پرەزيدەنتى نۇرسۇلتان نازاربايەۆتىڭ ەسىمى بەرىلدى.
2017-جىلى قاراعاندىدا تاۋ-يندۋستريالدىق كوللەدجىنىڭ بازاسىندا شاحتادا ورنالاسقان ەرەكشە مۋزەي اشىلدى. شاحتا 15 مەتر تەرەڭدىكتە ورنالاسقان، ونىڭ اۋماعى ءجۇز شارشى مەتردەن اسادى.
وندا قازىرگى شاحتالاردا قولدانىلاتىن قۇرال-جابدىقتار ورناتىلعان. ءار قۇرىلعىدا جابدىق تۋرالى اقپاراتتار ءۇش تىلدە كورسەتىلگەن.
2017-جىلى قازان قالاسىندا وتكەن XIII حالىقارالىق مۇسىلمان كينوفەستيۆالىندە قازاقستاندىق رەجيسسەر ءسابيت قۇرمانبەكوۆتىڭ «ورالمان» اتتى تۋىندىسى كورسەتىلدى. اتالعان كارتينانىڭ سەناريىن كينودراماتۋرگ نۇرلان سانجار جازىپ شىققان. وعان ءسابيت قۇرمانبەكوۆ تە كومەكتەستى. كومپوزيتورى - ايدوس ساعات.
باستى رولدەردى دۋلىعا اقمولدا، ەرجان ءتۇسىپوۆ، ەسىم سەگىزبايەۆ، شىنار اسقاروۆا، بايان قانجابيەۆا جانە تاعى باسقا اكتەرلار سومدادى.
2018-جىلى اقتوبەلىك ديزاينەر ءسابينا جانزاقوۆا ۇلتتىق كيىم ۇلگىسىمەن تۇركيانىڭ كەمەر قالاسىندا وتكەن حالىقارالىق بالالار جانە جاس وسپىرىمدەر شىعارماشىلىعى فەستيۆالىندە باس جۇلدەنى يەلەندى. وعان 15 ەلدەن 25 شىعارماشىلىق ۇجىم قاتىستى.