دەنيس تەننىڭ ءولىمى بويىنشا ۇستالعان 3- ادام جايلى نە بىلەمىز؟
ونى قاماۋ تۋرالى شەشىم 25 -شىلدەدە شىققان. ال مۇنىڭ الدىندا ق ر باس پروكۋرورىنىڭ ورىنباسارى مارات احمەتجانوۆ بريفينگ بارىسىندا ءىس بويىنشا ءۇشىنشى كۇدىكتىنىڭ قاماۋعا الىنعانىن حابارلاعان ەدى. ونىڭ ايتۋىنشا، ۇستالعان ادام قىلمىس تۋرالى حابارلاماعانى ءۇشىن ايىپتالىپ جاتىر.
«دالەل جەتكىلىكتى، ونىڭ زاڭدىلىعىن پروكۋرور تەكسەرىپ جاتىر. سوت بۇلتارتپاۋ شاراسى رەتىندە قاماۋعا الۋ تۋرالى شەشىم قابىلدادى»، - دەدى مارات احمەتجانوۆ ورتالىق كوممۋنيكاتسيالار قىزمەتىنىڭ بريفينگى بارىسىندا.
سونداي-اق، ول ەكى باپ بويىنشا قىلمىستىق ءىس قوزعالعانىن حابارلادى:
«ادامدار توبىمەن پايداكۇنەمدىك نيەتپەن ادام ءولتىرۋ» جانە «ادامدار توبىمەن پايداكۇنەمدىك نيەتپەن جاسالعان قاراقشىلىق». مۇنىڭ الدىندا دەنيس تەننىڭ ءولىمى بويىنشا ىستە ەكى كۇدىكتىنىڭ ۇستالعانى حابارلانعان بولاتىن. ونىڭ ءبىرى - قىزىلوردا وبلىسىنىڭ تۋماسى، 1994 -جىلعى قۇدايبەرگەنوۆ ارمان، ەكىنشىسى - جامبىل وبلىسىنىڭ تۋماسى، 1994 -جىلعى قياسوۆ نۇرالى داۋلەتبەك ۇلى.
ەسكە سالايىق، 19 -شىلدەدە الماتىدا بەلگىسىز بىرەۋلەر دەنيس تەندى پىشاقتاپ كەتكەن بولاتىن. وقيعا شامامەن 15.00-دە قۇرمانعازى مەن بايسەيىتوۆا كوشەلەرىنىڭ قيىلىسىندا بولعان. كەيىن قالالىق ءىىد وكىلدەرى دەنيس تەنگە اۆتوۇرىلار شابۋىل جاساعانىن مالىمدەدى. سويتسەك، سپورتشى ۇرىلاردىڭ ۇستىنەن تۇسكەن بولىپ شىقتى. جانجال كەزىندە سپورتشىنىڭ اياعىنا پىشاق ءتيىپ، كوپ قان جوعالتقان. ول اۋرۋحانادا كوز جۇمدى.
Kaz.tengrinews.kz