قازاقستاننىڭ مۇناي وڭدەۋ زاۋىتتارى 3 جىلدا ءبىر رەت قانا جوندەۋ جۇمىستارىنا توقتاتىلادى
بۇل تۋرالى بۇگىن ەلوردادا حالىققا ەسەپ بەرۋ كەزدەسۋى بارىسىندا ق ر ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات ءتىلشىسى.
«اعىمداعى جىلى شىمكەنت زاۋىتىنداعى جاڭعىرتۋ جۇمىستارى اياقتالادى. 2018-جىلى مۇناي وڭدەۋدىڭ جالپى كولەمى 1 ميلليون تونناعا ءوسىپ، 16 ميلليون تونناندان اسىپ جىعىلادى. كولىك جۇرگىزۋشىلەرى ءۇشىن مۇناي ونىمدەرىنىڭ ساپاسى ماڭىزدى. وسى جىلدىڭ باسىنان باستاپ، كەدەن وداعىنىڭ تەحنيكالىق رەگلامەنتى كۇشىنە ەندى. اعىمداعى جىلدىڭ شىلدەسىنەن باستاپ موتور وتىندارىنىڭ ساپاسى K-4 جانە K-5 ەكولوگيالىق كلاستارىنا سايكەس كەلۋى ءتيىس»، - دەدى قانات بوزىمبايەۆ.
ونىڭ ايتۋىنشا، اعىمداعى جىلى ءۇش مۇناي وڭدەۋ زاۋىتىنا ەنگىزىلەتىن جوندەۋدى باسقارۋدى اۆتوماتتاندىرۋ جۇيەسى مۇناي وڭدەۋ زاۋىتتارىن جوندەۋدىڭ جىلدىق كەزەڭىن 45 تەن 20 كۇنگە دەيىن قىسقارتۋعا مۇمكىندىك بەردى. 45 كۇنگە توقتاتۋ جۇمىستارى ءۇش جىلدا ءبىر رەت جۇزەگە اسىرىلاتىن بولادى.
«ءار مۇناي وڭدەۋ زاۋىتىنداعى مۇناي وڭدەۋ كولەمى وسى قابىلدانعان شارالاردىڭ ارقاسىندا ورتا ەسەپپەن جىلىنا 300 مىڭ تونناعا ارتادى دەپ كۇتىلۋدە. وسىلايشا، تاياۋ ارالىقتا ءبىزدىڭ نارىق وتاندىق مۇناي ونىمدەرىمەن تولىقتاي قامتاماسىز ەتىلەدى. اتاپ ايتقاندا، 5 ايدا نارىقتىڭ وتاندىق مۇناي ونىمدەرىمەن قامتاماسىز ەتىلۋى بەنزين بويىنشا - 85، ديزەلدىك وتىنمەن - 95، اۋە كەروسينمەن شامامەن 36 پايىزعا جەتتى»، - دەدى ول.
قانات بوزىمبايەۆتىڭ اتاپ وتۋىنشە، تاپشىلىقتى بولدىرماۋ ماقساتىندا ەنەرگەتيكا مينيسترلىگىمەن تاۋلىك بويى مۇناي بازالارىنداعى ونىمدەر كولەمى جانە جانار-جاعارماي يمپورتى باقىلاۋدا بولادى.