الماتىنىڭ 3 نىسانى مادەني ەسكەرتكىشتەر تىزىمىنەن شىعارىلماق
قاۋلىنىڭ جوباسى ەلەكتروندى ۇكىمەت پورتالىنىڭ اشىق ۇكىمەت بولىمىندە جاريالاندى جانە ول 2018 -جىلدىڭ 7 - ناۋرىزىنا دەيىن كوپشىلىكتىڭ تالقىلاۋىندا بولادى.
وعان سايكەس، الماتى اكىمدىگىنىڭ 2010 -جىلعى 10 - قاراشا كۇنگى №4/840 «الماتى قالاسىنداعى جەرگىلىكتى ماڭىزى بار تاريحي- مادەني ەسكەرتكىشتەردىڭ مەملەكەتتىك ءتىزىمىن بەكىتۋ تۋرالى» قاۋلىسىنا وزگەرىستەر ەنگىزۋ كوزدەلگەن.
اتاپ ايتقاندا، №3، №68 جانە №73 رەتتىك نومىرلەرىمەن بەلگىلەنگەن نىساندار تاريحي- مادەني ەسكەرتكىشتەر مەملەكەتتىك تىزىمىنەن الىنىپ تاستالاتىن بولادى.
ولار: №68 ەسكەرتكىش - بوگەنباي باتىر كوشەسى، 140 مەكەنجايىندا ورنالاسقان بۇرىنعى «ىسسىق» قوناق ءۇيىنىڭ (قازىرگى «سەپتەر» فيرماسىنىڭ كەڭسەسى) عيماراتى. «ىسسىق» قوناق ءۇيى وتكەن عاسىردىڭ 30-40 -جىلدارىنداعى العاشقى قوناق ءۇي كەشەنى بولاتىن. ءۇش قاباتتى عيماراتقا كەڭەس وداعى كەزىندە ءار وڭىردەن بەلسەندى ازاماتتار فورۋمدار مەن سيەزدەرگە جينالاتىن.
سونداي- اق № 3 نىسان - قورعان تاريحي- ارحەولوگيالىق ەسكەرتكىشى. قورعان ب. ز. د. VI- III عاسىرلارعا تيەسىلى.
№73 ساۋلەت ەسكەرتكىشى - مايلين كوشەسىندە ورنالاسقان الماتى اۋەجايىنىڭ بۇرىنعى عيماراتى. بۇل - قازاقستانداعى العاشقى اۋەجاي عيماراتى. 1937 -جىلى بوي كوتەرگەن، 1957 -جىلى قايتا جوندەلدى. ۇلتتىق ناقىش بەرىلگەن العاشقى عيماراتتاردىڭ ءبىرى سوعىس جىلدارىنا دەيىنگى قوعامدىق ساۋلەت ونەرىنىڭ جارقىن ۇلگىسى. قازىر مۇندا بيزنەس- تەرمينال ورنالاسقان.
الماتى اكىمى وسى قاۋلىنىڭ ورىندالۋىن باقىلاۋدى الماتى قالاسى اكىمىنىڭ ورىنباسارى ارمان قىرىقبايەۆقا جۇكتەدى. قاۋلى ادىلەت ورگاندارىندا مەملەكەتتىك تىركەلگەن كۇننەن باستاپ كۇشىنە ەنەدى جانە ول العاش رەسمي جاريالانعاننان كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.
اۆتور: گۇلميرا عوسمانالي