حالقىنىڭ سانى 3 ميلليونعا جەتەتىن استاناعا مونۋمەنت كوپتىك ەتپەيدى - نازاربايەۆ

استانا. قازاقپارات - بۇگىن استانادا «ۇلى دالا ەلى» اتتى مونۋمەنتتى سالتاناتتى تۇردە اشىپ بەرگەن مەملەكەت باسشىسى نۇرسۇلتان نازاربايەۆ بولاشاقتا حالقىنىڭ سانى ءۇش ميلليونعا جەتەتىن ەلورداعا مونۋمەنتتىڭ كوپتىك ەتپەيتىنىن ءمالىم ەتتى، دەپ حابارلايدى قازاقپارات.

مونۋمەنت 2017 -جىلى باستالاتىن ەكسپو-2017 كورمەسىنىڭ اۋماعىندا ورنالاسقان.

سوندىقتان، مەملەكەت باسشىسى اتاپ وتكەندەي، ميلليونداعان تۋريستەر قازاقستان تاۋەلسىزدىگى تۋرالى بىلەتىن بولدى. «قۇداي بۇيىرتسا، ەكسپو كورمەسىن اشقان كەزدە، دۇنيەجۇزىنەن ميلليونداعان تۋريستەر كەلىپ، وسى جەردە جۇرەدى. سوندا، مىنا مونۋمەنتكە قاراپ، قازاقستاننىڭ تاۋەلسىزدىگىنە 25 جىل ەكەنىن ەستەرىنە تۇسىرەر دەپ ويلايمىن. ەكسپو كورمەسى قالانىڭ ءبىر اۋدانىن الىپ جاتىر. قالانىڭ كوركىن وزگەرتەيىن دەپ تۇر. بولاشاقتا حالقىنىڭ سانى 3 ميلليون ادامعا جەتكەن كەزدە، حالىق كوپ بارىپ، دەمالاتىن ورىندار كەرەك. دۇنيەجۇزىندەگى استانالاردىڭ ەشقايسىسىنا مۇنداي مونۋمەنت كوپتىك ەتپەيدى»، - دەدى پرەزيدەنت.

مونۋمەنتتى سالعان قۇرىلىس كومپانياسىنىڭ مالىمەتىنە سۇيەنسەك، مونۋمەنت 3 جارىم اي ۋاقىتتا سالىنعان ەكەن. مونۋمەنتتىڭ 25 قىرى تاۋەلسىزدىكتىڭ 25 جىلى تۋرالى سىر شەرتەدى. مونۋمەنت انتيكا مرامورىنان سالىنعان.

اۆتور: كەنجەكەي توقتامۇرات قىزى