جەكپە-جەگىنە 3 كۇن قالعان قانات يسلام قالاي دايىندالىپ جاتىر؟
12:04, 26 - قازان 2016
استانا. قازاقپارات - 29- قازان كۇنى «الماتى ارەنا» سپورت سارايىندا، كاسىپقوي بوكسشى قانات يسلام «WBA Fedelatin» بەلبەۋىن قورعاۋ جانە قۇرلىقارالىق WBO چەمپيوندىق بەلبەۋى ءۇشىن گانالىق بوكسشى پاتريك اللوتەيمەن جەكپە-جەككە شىعاتىنى بەلگىلى.
جەلىدە سول جەكپە-جەككە بوكسشىنىڭ قالاي دايىندالىپ جاتقان ۆيدەوسى پايدا بولدى دەپ حابارلايدى NUR. KZ.
وسىدان ءبىر اي بۇرىن 23- قىركۇيەكتە باسپا ءسوز ءماسليحاتىن وتكىزگەن قانات ءوز ەلىندەگى العاشقى جەكپە-جەكتىڭ جۇگى اۋىر ەكەنىن ايتقان بولاتىن.
«تۇڭعىش رەت ءوز ەلىمدە كەزدەسۋ وتكىزگەلى وتىرمىن. بۇل ۇلكەن جاۋاپكەرشىلىك. قارسىلاسىم وسال ەمەس. 36 كەزدەسۋ وتكىزىپ، ونىڭ 28 ءىن نوكاۋتپەن جەڭگەن. جەرلەستەرىمنىڭ قولداۋىنا سەنەمىن. قازىرگى جاتتىعۋىم IBA اكادەمياسىندا ءوتىپ جاتىر»، - دەگەن بولاتىن قانات يسلام.
ەسكە سالاتىن بولساق، الماتىداعى بوكس كەشىندە قانات يسلامنان وزگە جانقوش تۇراروۆ، رۋسلان مىرساتايەۆ، الي احمەتوۆ، ايدار شارىبايەۆ پەن ايدوس ەربوسىن ۇلى شارشى الاڭعا شىقسا، جانىبەك ءالىمحان ۇلى كاسىپقوي بوكستاعى العاشقى جەكپە-جەگىن وتكىزەدى.