اقمولا وبلىسىندا جەر رەفورماسى بويىنشا قۇرىلعان جۇمىس توبىمەن 3 ءماجىلىس وتكىزىلدى - ق. وتاروۆ
بۇل تۋرالى وبلىس اكىمىنىڭ ءبىرىنشى ورىنباسارى قادىرحان وتاروۆ ءمالىم ەتتى.
ونىڭ ايتۋىنشا، وبلىستىق جۇمىس توبىنىڭ وڭىرلەردە ءتۇسىندىرۋ جۇمىستارىن جۇرگىزۋگە ارنالعان جەلىلىك شارالار كەستەسى جاسالعان. جەر رەفورماسى بويىنشا جۇمىس توپتارىن قۇرۋعا ارنالعان وسىنداي شارالار جەرگىلىكتى جەرلەردە دە جۇزەگە اسىرىلۋدا.
«جۇمىس توبى قۇرىلعالى بەرى 3 ءماجىلىس وتكىزىلدى، ونىڭ ىشىندە 2 ءۋى وبلىستىق قوعامدىق كەڭەستىڭ پىكىرسايىس الاڭىندا تۇرعىنداردىڭ ءتۇرلى توپتارىن، جەرگىلىكتى زيالى قاۋىم، اۋىل شارۋاشىلىق تاۋارلارىن وندىرۋشىلەر، دەپۋتاتتار، قوعامدىق ۇيىمدار، ساياسي پارتيالار مەن بۇقارالىق اقپارات قۇرالدارىنىڭ وكىلدەرىن تارتا وتىرىپ وتكىزىلدى.
سونىمەن بىرگە، جىل باسىنان بەرى بەلگىلەنگەن كەستەگە ساي تىكەلەي اۋىل شارۋاشىلىق تاۋارلارىن وندىرۋشىلەرمەن، سونداي-اق، جەرگىلىكتى تۇرعىنداردى قاتىستىرا وتىرىپ، وبلىستىڭ بارلىق وڭىرلەرىندە كوشپەلى سەمينار-كەڭەستەر وتكىزىلدى.
وسىنداي سەمينار-كەڭەستەر بارىسىندا، جەر تۋرالى زاڭنامالاردى وزگەرتۋ نەگىزىنەن اۋىل شارۋاشىلىعى جەرلەرىنە قاتىستى ەكەندىگىنە قاراماستان، وبلىستىڭ جەكەلەگەن وڭىرلەرىندە تۇرعىن ءۇي سالۋ ءۇشىن جەر تەلىمدەرىن بەرۋ ماسەلەسى دە كوتەرىلدى»، - دەدى ق. وتاروۆ.
ايتا كەتۋ كەرەك، اقمولا وبلىسى بويىنشا بۇگىنگى كۇنى جەكە مەنشىك تۇرعىن ءۇي سالۋعا قاجەتتى جەر تەلىمدەرىن الۋعا بايلانىستى 100636 ادام كەزەكتە تۇر.
بەرىلگەن وتىنىشتەردىڭ باسىم كوپشىلىگى استانا قالاسىنىڭ ماڭايىنداعى ايماقتارعا قاتىستى بولىپ وتىر (ارشالى اۋدانىندا - 5996، شورتاندى - 5567، سەلينوگراد - 69147، كوكشەتاۋ قالاسى - 11748، بۋراباي - 4883).
بۇگىنگى كۇنى وبلىستا سۋ جانە ەلەكترمەن قامتاماسىز ەتىلگەن اۋماعى 103,7 گەكتار بولاتىن 1037 جەر تەلىمى، ينفراقۇرىلىمى جوق 1150,2 گەكتار اۋماقتى الىپ جاتقان 11502 جەر تەلىمى بار.
جەكە مەنشىك تۇرعىن ۇيلەر سالۋعا قاجەتتى جەر تەلىمدەرى بەرىلمەۋىنىڭ نەگىزگى سەبەبى ينفراقۇرىلىم جۇرگىزىلگەن دايىن جەر الاڭدارىنىڭ جانە جەر قورىنىڭ، ونىڭ ىشىندە استانا ماڭايىنداعى ەلدى مەكەندەر اۋماعىنداعى جەردىڭ جوقتىعى بولىپ وتىر.
قاجەتتى ينفراقۇرىلىمى بار (ەلەكتر جانە سۋمەن قامتىلعان) ءبىر جەر تەلىمىنىڭ وزىندىك قۇنى 800 مىڭ تەڭگەنى قۇرايدى.
اۆتور: اسلان وسپانوۆ