«مەندە قازاقستان اۋماعىنا ناقتى قانشا رەسەي ازاماتىنىڭ كەلگەنى تۋرالى مالىمەت جوق. دەگەنمەن، ەلگە كەلگەن رەسەيلىكتەردىڭ جۇمىسقا تۇرۋى بويىنشا ستاتيستيكا جۇرگىزەمىز. بۇگىندە ەلىمىزدە 39 مىڭ رەسەي فەدەراتسياسىنىڭ ازاماتى جۇمىس ىستەپ جاتىر»، - دەدى ەربول وسپانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونىمەن قاتار، ۆيتسە-مينيستر رەسەي ازاماتتارىنا ارنالعان ەڭبەك ەرەجەلەرىنە قاتىستى پىكىر ءبىلدىردى.
«قۇرامىنا 5 ەل كىرەتىن ءبىرىڭعاي ەكونوميكالىق ايماق بار. ونىڭ ىشىنە رەسەي فەدەراتسياسى دا كىرەدى. سوندىقتان دا، رەسەيلىكتەر ءۇشىن ەڭبەك ەرەجەلەرىندە وزگەرىس جوق. ءوز ازاماتتارىمىز ءۇشىن دە، رەسەيلىكتەر ءۇشىن دە قويىلاتىن تالاپ بىردەي»، - دەيدى ول.
ايتا كەتسەك، بىرەر كۇن بۇرىن قازاقستاندا 300 مىڭعا جۋىق رەسەي ازاماتى جۇرگەنى تۋرالى حابارلانعان ەدى.
«جىل باسىنان بەرى قازاقستانعا ءۇش ميلليونعا جۋىق رەسەيلىك كەلدى، ەل اۋماعىنان شىققاندار سانى دا شامامەن بىردەي بولدى. رەسەيدە ءىشىنارا موبيليزاتسيا جاريالانعالى ەلىمىزگە 837 مىڭ رەسەيلىك كەلدى، 780 مىڭ ادام قايتا كەتتى. قازىرگى ۋاقىتتا ەلىمىزدە 298 مىڭ رەسەيلىك بار، ونىڭ 30 مىڭى ەڭبەك بيرجاسىندا تىركەلگەن شارتتارعا سايكەس جۇمىس ىستەيدى»، - دەگەن ەدى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ.