ارناۋلى اسكەري جيىنعا قابىلدانعانداردىڭ باسىم بولىگى - وتانعا قىزمەت ەتۋ ءۇشىن جەرگىلىكتى اسكەري كوميسسارياتقا ءوز ەركىمەن كەلگەندەر. س ق و قورعانىس ىستەرى جونىندەگى دەپارتامەنتىنىڭ مالىمەتىنشە، ءوڭىردىڭ اسكەري مىندەتتى 50 شاقتى ازاماتىنان ءوتىنىش تۇسكەن.
نيەت بىلدىرگەندەردىڭ ەڭ الدىمەن دەنساۋلىعىنا باسا نازار اۋدارىلدى.
«دەنساۋلىعىنان بولەك جاس شاماسى دا ەسكەرىلدى. وتباسىلىق جاعدايىنا دا قارادىق. ءۇش جانە ودان دا كوپ بالاسى بارلاردى جيىننان بوساتتىق. نەگىزگى جۇمىسىندا قانشا ەڭبەكاقى السا، سونشا تولەنەتىن بولادى. ال ەگەر جۇمىس ىستەمەسە نەمەسە كارانتيننىڭ جاريالانۋىنا بايلانىستى جۇمىسىنان شىعىپ قالسا وندا 42 مىڭ 500 تەڭگە ەڭبەكاقى الادى»، - دەيدى س ق و قورعانىس ىستەرى جونىندەگى دەپارتامەنت باسشىسى تالعات ءالىقۇلوۆ.
پەتروپاۆلدان ارنايى اسكەري جيىنعا 39 ادام قابىلداندى. ولاردىڭ جاستارى 22 مەن 44 ارالىعىندا. اسكەري قىزمەتشىلەر پەتروپاۆل كوشەلەرىن، قوعامدىق ورىنداردى زارارسىزداندىراتىن بولادى.
«ازىرشە 20 كۇنگە شاقىرىلدى. بارلىعى پەتروپاۆل قالاسىنىڭ تۇرعىندارى. تاڭعى ساعات 9.00 دەن كەشكى 18.00 دەيىن جۇمىس ىستەيدى. بۇگىن تاڭەرتەڭ ولاردى قاجەتتى كيىم-كەشەكپەن قامتىدىق. سونداي-اق كوروناۆيرۋس ينفەكتسياسىنا تەكسەرىپ تەست الدىق. قولعا الىنعان ءىس-شارا ەلىمىزدىڭ تەزىرەك قالىپتى ومىرگە ورالۋى ءۇشىن، حالقىمىزدىڭ دەنساۋلىعى ءۇشىن جاسالىپ جاتىر»، - دەيدى س ق و اكىمىنىڭ قاۋىپسىزدىك جانە قورعانىس اسكەري قىزمەت جونىندەگى كومەكشىسى داۋلەت تولىباي.
ەستەرىڭىزدە بولسا، بۇعان دەيىن جامبىل وبلىسىنان ارنايى كەلگەن 50 اسكەري قىزمەتشىنىڭ پەتروپاۆل كوشەلەرىن دەزينفەكتسيالاپ جاتقانىن ايتقان ەدىك.