وسى ۇلكەن وتباسى مۇشەلەرى تۇگەل ءبىر ۇيدە تۇرادى. ولار ءتورت قاباتتى ۇلكەن ءۇيدىڭ 100 بولمەسىنە ءبولىنىپ ورنالاسقان.
سيونا حانا مىرزانىڭ ءوزى وتباسىنداعى بارلىق ايەلدەرى مەن بالالارىن بارلىق جاعىنان قامتاماسىز ەتە الاتىنداي اۋقاتى بار باي ادام. ول جەرگىلىكتى ءبىر سەكتانى باسقارادى. وسى ءدىني ۇيىمنىڭ ەرەجەسىنە سايكەس، ءاربىر ەركەك قانشا ايەل بولسا دا قالاعانىنشا الا بەرەدى. تەك شاماسى جەتسە بولدى. دەمەك، حانا ءۇيىن گارەمگە اينالدىرىپ جىبەرگەنىمەن، ءوز قانۇندارى بويىنشا ءتارتىپتى بۇزىپ وتىرعان جوق.
ال سيونا باسقارعان ءۇيدىڭ ءاربىر مۇشەسى وسىندا وتاعاسى ورناتقان تەمىردەي تارتىپكە باعىنادى. وسىعان وراي ايەلدەردىڭ دە ءاربىرىنىڭ اتقاراتىن ءوز مىندەتتەرى بار. ولار ۇيدەگى جۇمىستاردى ءوزارا ءبولىسىپ العان. ءبىر ايەلدەر ءۇيدىڭ تازالىعى ءۇشىن جاۋاپ بەرسە، ەندى بىرەۋلەرى كىر جۋۋمەن اينالىسادى، ۇشىنشىلەرى اسحانادا تاماق دايىنداۋعا بولىنگەن.
ايتا كەتەتىن جايت، بۇل ۇلكەن شاڭىراقتا ءبىر مەزگىلدىك كەشكى اس ءۇشىن 220 ك گ كۇرىش، 30 تاۋىق جانە 132 ك گ كارتوپ پايدالانىلادى. بۇلاردىڭ قاتارىنا باسقا كوكونىس- باقشا داقىلدارى مەن سۋسىندار قوسىلىپ وتىرعان جوق.
قازىرگى سىڭايىنا قاراعاندا، سيونا حاننىڭ جاعدايى جامان ەمەس سياقتى. سوندىعىنان بولار، ول تەك وتكەن جىلى عانا تاعى 10 ايەلگە ۇيلەنگەن ەكەن.
ايەلگە باي ەركەك ءوزىنىڭ مۇنىمەن توقتاپ قالمايتىنىن، الداعى ۋاقىتتا ءالى دە ۇيلەنە تۇسەتىنىن ايتادى. ول كۇشى مەن دەنساۋلىعى جەتكەنشە جۇبايلارى سانىن ارتتىرا بەرەتىنىنە سەنىمدى.
بۇعان حانا مىرزانىڭ بالالارى قارسىلىق كورسەتپەيدى، قايتا قولداپ وتىرادى. سەبەبى، ولاردىڭ ۇعىمىنشا، اكەلەرى وسى ارقىلى وكرۋگتەگى قانشاما كەدەي قىزدى باۋىرىنىڭ استىنا الىپ، ولارعا قامقورلىق جاسايتىن بولادى. ەگەر اكەلەرى وسى قىزداردى الماسا، ولاردىڭ كۇندەرى قاراڭ بولار ەدى.
حانا مىرزانىڭ ۇيىندەگى بولمەلەر دە وزىندىك ءبىر تارتىپپەن بولىنگەن. ادەتتە سيوناعا جاقىن ماڭداعى بولمەلەردە ونىڭ ەڭ جاس ايەلدەرى تۇرادى. ولار كۇيەۋلەرىنە كەزەكتەسىپ كەلىپ تۇرادى. ال قالعاندارى ۇلكەن جاتاقحانا سەكىلدى بولمەلەرگە ورنالاسقان.
ras.kz