بۇل تۋرالى رەنحاپ اگەنتتىگىنە سىلتەمە جاساپ قازاقپارات حابارلايدى. ءورت سالدارىنان 38 ادام قازا بولىپ، 10 ادام ءتۇرلى دارەجەدە جاراقات العان. ءورت سوندىرۋشىلەردىڭ ايتۋىنشا، سارسەنبى كۇنى كۇندىز سەۋلدەن وڭتۇستىك- شىعىسقا قاراي 50 شاقىرىم جەردە ورنالاسقان ينچحون قالاسىندا سالىنىپ جاتقان ءتورتقاباتتى عيمارات ورتەنە باستاعان.
جالىن بەس ساعاتتان سوڭ ءسوندىرىلدى. جەرگىلىكتى بيلىك ورتكە قۇرىلىس جۇمىستارى كەزىندە ۋرەتان جارىلۋى سەبەپ بولعان دەپ سانايدى. كوز جۇمعان 38 ادامنىڭ كوبى - قۇرىلىسشىلار. بەيسەنبى كۇنى تاڭەرتەڭگى جاعداي بويىنشا، جاراقات العان سەگىز ادام اۋىر حالدە جاتىر، ەكى ادام جەڭىل جاراقات العان.
ەسكە سالا كەتسەك، ينچحوندا الەمدە DRAM چيپتارىن شىعارۋ بويىنشا ەكىنشى ورىندا تۇرعان SK hynix Inc. كومپانياسى، سونداي-اق بولشەك ساۋدانىڭ كوپتەگەن قويمالارى ورنالاسقان. ىزدەۋ- قۇتقارۋ جۇمىستارى ءالى ءجۇرىپ جاتىر.
پوليتسيا، ءورت كۇزەتى ورگاندارى جانە ۇلتتىق سوت- مەديتسينالىق قىزمەتى ءورتتىڭ شىعۋ سەبەبىن انىقتاۋ ءۇشىن بىرلەسكەن تەرگەۋ باستاۋدى جوسپارلاۋدا. بيلىك دەنەسى قاتتى كۇيىپ، قازا بولعان توعىز ادامنىڭ كىم ەكەنىن انىقتاۋ جۇمىسىن باستاپ كەتتى.
ادامداردىڭ اتى-ءجونىن انىقتاۋ پروتسەسى تولىق اياقتالعان سوڭ توتەنشە جاعداي كەزىندە كومەك كورسەتەتىن قالالىق توپ ءورت قۇرباندارىن ەسكە الۋ قۇرمەتىنە مەموريالدىق ەسكەرتكىش ورناتپاق.