قىتايلىق Dalian Hesheng Holdings كومپانياسى اقمولا وبلىسىندا «ازيا التىن دان» ج ش س- مەن بىرلەسىپ، قۇنى 385 ميلليارد تەڭگە بولاتىن ءىرى ينۆەستيتسيالىق جوبانى جۇزەگە اسىرىپ جاتىر.
— جوبا اياسىندا شامامەن 800 جۇمىس ورنىن قۇرۋ كوزدەلگەن. الايدا شەتەلدىك كومپانيانىڭ باس ديرەكتورىنىڭ قازاقستاندا جۇمىس ىستەۋىنە قاجەتتى ينۆەستورلىق ۆيزانى راسىمدەۋ تۋرالى ءوتىنىشى ەكى رەت قۇپتالماعان. وسىعان بايلانىستى ينۆەستور اقمولا وبلىسىنىڭ پروكۋراتۋراسىنا جۇگىنگەن، — دەلىنگەن حابارلامادا.
پروكۋراتۋرا ۋاكىلەتتى مەملەكەتتىك ورگاندارمەن جۇمىس جۇرگىزىپ، ماسەلەنى رەتتەۋگە ىقپال ەتتى. ناتيجەسىندە Dalian Hesheng Holdings كومپانياسىنىڭ باس ديرەكتورى ءۇشىن ينۆەستورلىق ۆيزا راسىمدەلدى.
ەندى كومپانيا باسشىسى قازاقستاندا بولىپ، زاۋىت قۇرىلىسى مەن ينۆەستيتسيالىق جوبانىڭ ىسكە اسىرىلۋ بارىسىن جەكە ءوزى باقىلاي الادى. ينۆەستورلىق ۆيزانىڭ راسىمدەلۋى كومپانيا باسشىسىنا جوبانى جۇزەگە اسىرۋعا تىكەلەي قاتىسۋعا، زاۋىت قۇرىلىسىن باقىلاۋعا جانە تۋىندايتىن ماسەلەلەردى جەدەل شەشۋگە مۇمكىندىك بەرەدى.
اقمولا وبلىسىنىڭ پروكۋراتۋراسى ينۆەستورلاردىڭ قۇقىعىن قورعاۋ جانە ينۆەستيتسيالىق جوبالاردى ىسكە اسىرۋعا كەدەرگى كەلتىرۋى مۇمكىن اكىمشىلىك توسقاۋىلداردىڭ الدىن الۋ باعىتىنداعى جۇمىستى جالعاستىرا بەرمەك.
بۇعان دەيىن قىزىلوردادا كاسىپكەردىڭ قىزمەتىنە زاڭسىز ارالاسقان سەس باسشىسى جازالانعانىن جازعان ەدىك.