بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«2022 -جىلى اۆتوبۋس جۇرگىزۋشىلەرىنىڭ كىناسىنەن 382 جول-كولىك وقيعاسى ورىن الىپ، 37 ادام قايتىس بولدى، 639 ادام جاراقاتتاندى. ونىڭ ىشىندە جول-كولىك وقيعاسىنىڭ 70 پايىزدان استامى تۇراقتى تاسىمالداۋ باعدارلارى بولعان. جولاۋشىلار كولىگىنىڭ قاتىسۋىمەن بولعان جول- كولىك وقيعالارىن قىسقارتۋ جانە جولاۋشىلاردى تاسىمالداۋ قاعيدالارىنىڭ ساقتالۋىن باقىلاۋدى كۇشەيتۋ ماقساتىندا جىل سايىن كولىكتىك باقىلاۋ، توتەنشە جاعدايلار جونىندەگى ينسپەكتسيالارىنىڭ، اكىمدىكتەر جانە قوعامدىق بىرلەستىكتەردىڭ قىزمەتكەرلەرىن تارتا وتىرىپ، «اۆتوبۋس» رەسپۋبليكالىق جەدەل-الدىن الۋ ءىس-شاراسى وتكىزىلەدى»، - دەپ اتاپ وتەدى ءبىرىنشى ۆيتسە-پرەمەر جاۋابىندا.
ۇكىمەت باسشىسى ءبىرىنشى ورىنباسارىنىڭ دەرەگىنشە، وتكەن جىلى اتالعان ءىس-شارانىڭ ناتيجەسىندە قوعامدىق كولىك جۇرگىزۋشىلەرىنىڭ 65 مىڭنان استام جول ەرەجەسىن بۇزعانى انىقتالدى. ونىڭ ىشىندە ماس كۇيىندە اۆتوبۋستاردى باسقارۋ، جولاۋشىلاردى زاڭسىز تاسىمالداۋ، كولىك قۇرالدارىن زاڭسىز قايتا جابدىقتاۋ، كولىكتى باسقارۋ كەزىندە ۇيالى تەلەفونداردى قولدانۋ سىندى فاكتورلار بار.
«اۆتوبۋس پاركتەرىنىڭ، ونىڭ ىشىندە حالىقارالىق جانە قالاارالىق تاسىمالداردى جۇزەگە اسىراتىن، 600 دەن استام لاۋازىمدى تۇلعاسى اكىمشىلىك جاۋاپكەرشىلىككە تارتىلدى، 200 دەن استام رۇقسات ەتىلمەگەن تۇراقتى ۇيىمداستىرۋ جۇمىسى توقتاتىلدى. كولىكتىك قىزمەت كورسەتۋدى ۇيىمداستىرۋدى جاقسارتۋ اياسىندا 410 جوسىقسىز تەحنيكالىق بايقاۋ وپەراتورىنىڭ قىزمەتى توقتاتىلدى. ايىپپۇل سالۋمەن 270 اكىمشىلىك ماتەريال رەسىمدەلدى»، - دەدى رومان سكليار.