قايتىس بولعان 37 جاستاعى ازاماتشانىڭ جۇرەگى مەن بۇيرەگى، باۋىرى ناۋقاستارعا بەرىلدى
قايتىس بولعان ازاماتشانىڭ جۇرەگى مەن بۇيرەگى، باۋىرى ناۋقاستارعا بەرىلگەن، دەپ حابارلايدى pavlodarnews.kz.
37 جاستا دۇنيە سالعان ولەسيا پۋشكينانىڭ تۋىستارى جۋرناليستەرمەن كەزدەسىپ، ورگانداردى ترانسپلانتاسياعا بەرۋ تۋرالى شەشىمدى قالاي قابىلداعاندارىن ايتىپ بەردى.
№ 1 اۋرۋحانانىڭ باس دارىگەرى سوۆەتحان سماقوۆتىڭ ايتۋىنشا، قازاقستاندا 3052 ناۋقاسقا دونورلىق ورگانداردى اۋىستىرۋ كەرەك. بۇل - جاس جانە ەڭبەككە جارامدى جاندار. پاۆلودار وبلىسىندا مۇنداي ناۋقاستاردىڭ سانى - 125، ولاردىڭ ۇشەۋى - بالالار. ەلىمىز بويىنشا ترانسپلانتاسيا جاسالعان 750 ادامنىڭ 24- ءى - پاۆلودارلىق. جەرلەستەرىمىزدىڭ 23- ءى وتانى ءساتتى وتكەرىپ، دەرتىنەن ايىعىپ كەتكەن. وكىنىشكە وراي، ءبىر ادام بوتەن ادامنىڭ اعزاسىن قابىلداي الماي قايتىس بولعان.
قازاقستاندا ترانسپلانتولوگيا بويىنشا باستى ماسەلە ماتەريالدىق رەسۋرسقا ەمەس، الماستىرۋ ءۇشىن ورگانداردىڭ تاپشىلىعىنا بايلانىستى. دەگەنمەن، بۇل جاعداي بۇكىل الەمدە وتكىر تۇر. ءتورت جىل ىشىندە بارلىعى 37 مۋلتي ورگاندى دوناتسيا تىركەلگەن: بەسەۋى - الماتىدا، تورتەۋى - استانادا جانە ءبىر- بىردەن - قوستاناي، س ق و، پاۆلودار وبلىستارىندا.
«ولەسيا پۋشكينا گەمورراگيالىق ينسۋلت الۋدىڭ ناتيجەسىندە دارىگەرلىك كوميسسيامەن زەرتتەۋدەن كەيىن ميدىڭ تىرشىلىك بەلگىسىن توقتاتقانى انىقتالدى»، - دەيدى سوۆەتحان سماقوۆ.
- ناۋقاستىڭ تۋىستارى ۇلكەن ەرلىك جاساپ، دوناتسياعا كەلىستى. جۇرەگى مەيىرىمگە تولى جاندار عانا مۇنداي ىسكە بارادى. سوڭعى ەكى جىل بويى دوناتسيا بولعانمەن، تۋىستارى كەلىسىم بەرمەگەن بىرنەشە جاعداي ورىن العان. ولەسيا پۋشكينانىڭ ورگاندارى اۋىر دەرتكە شالدىققان ادامدارعا بەرىلدى. ونىڭ جۇرەگى ەندى 62 جاستاعى ەر ادامنىڭ كەۋدەسىندە سوعىپ تۇر. باۋىرى ەگدە جاستاعى ايەلگە سالىندى. وكىنىشكە وراي، بۇيرەگى باسقا ادامنىڭ اعزاسىنا ءبىتىسىپ كەتە المادى. ءبىز ولەسيا پۋشكينانىڭ وتباسىن ءوز قامقورلىعىمزعا الۋ تۋرالى شەشىم قابىلدادىق. ولارعا بارىنشا قولداۋ جاساۋعا تىرىسامىز.
ولەسيا پۋشكينانىڭ اناسى نادەجدا بەلايانىڭ ايتۋىنشا، مۇنداي قايعىلى وقيعا بولادى دەپ ەشكىم دە ويلاماعان. - قىزىمىڭ باسى اۋىرىپ، قۇربىسىنا تەلەفون شالدى دا دالاعا شىعىپ كەتتى. سودان كەيىن ءبىز ونى تىرىدەي كورمەدىك. مەن بىردەن ترانسپلانتاسياعا كەلىسپەدىم. ءبىز ۇيدە ءۇش كۇن بويى اقىلداستىق. پسيحولوگ دارىگەرگە راحمەت، سەبەبى ول ادام بولماسا اۋىر قازانى كوتەرە الماس تا ەدىم. قازىر ءبىزدى قىزىمنىڭ ىشكى اعزاسى ورنالاستىرىلعان ناۋقاستاردىڭ قال جاعدايى تولعاندىرىپ وتىر. ءبىز ولارعا دەنساۋلىق تىلەيمىز. قىزىمىز دۇنيەدەن وتكەنىمەن، ونىڭ جۇرەگى ءالى دە سوعىپ تۇر. الەۋمەتتىك جەلىلەردە سان ءتۇرلى پىكىرلەر جازىلدى. سوندىقتان تىلشىلەرمەن كەزدەسىپ، مۇنىڭ ءبارى شىن كوڭىلدەن بىرەۋگە كومەك بەرۋ ءۇشىن جاسالعانىن ايتقىم كەلىپ وتىر. ادامدار بوتەن ويعا قالماسىن، - دەدى اناسى.
ولەسيانىڭ قىزى ارينا 18 جاستا. ول قازىرگى ۋاقىتتا مەديتسينالىق كوللەدجدە ءبىلىم الۋدا. كەيىن نوۆوسىبىردەگى مەدينستيتۋتتا گەماتولوگ ماماندىعى بويىنشا وقۋىن جالعاستىرۋعا نيەتتى. - ىشكى اعزالاردى اۋىستىرۋ قاجەت بولعان ادامدار وتە اۋىر جاعدايدا دەپ ايتتى بىزگە. مەنىڭ انام ومىردە وتە مەيىرىمدى بولاتىن. ونىڭ جۇرەگى سوعىپ تۇر، ياعني ول - ءتىرى، - دەيدى ارينا. سونداي- اق ولەسيا پۋشكينانىڭ كوكشەتاۋدان كەلگەن تاتەسى ليۋدميلا گريدنيەۆانىڭ ايتۋىنشا، دونورلىققا رۇقسات بەرۋگە تاعى ءبىر جاعداي سەبەپ بولعان. ارينانىڭ دا وكپەسى دەرتكە شالدىققان ەكەن، وسىنى ويلاعان تۋىستارى بىردەن كەلىسىمدى بەرگەن. № 1 قالالىق اۋرۋحانانىڭ دارىگەرلەرى تەكسەرۋدەن كەيىنگى قورىتىندى بويىنشا ارينانىڭ وكپەسىنە ەشقانداي قاۋىپ جوق ەكەنىن ايتىپ، تۋعاندارىن ءبىر قۋانتىپ قويدى. تاعى ءبىر جاعىمدى جاڭالىق، ك م ف بانكىنەن ولەسيا پۋشكينانىڭ العان شاعىن نەسيەسى بويىنشا حابارلاسقان. ولار ولەسيانىڭ قايتىس بولعانىن جانە ءوز دەنە مۇشەلەرىن وزگە ادامداردىڭ ءومىرىن ساقتاپ قالۋ ءۇشىن بەرگەندىگىن بىلگەن سوڭ، بارلىق قارىزدى سىزىپ تاستاعانىن ايتقان.