مارافونشى جاننا ماماجانوۆا 35 جىلدان كەيىن ەل رەكوردىن جاڭارتتى

نۇر- سۇلتان. قازاقپارات - نيدەرلاندىدا وتكەن روتتەردام مارافونىندا وتانداسىمىز جاننا ماماجانوۆا قازاقستان رەكوردىن جاڭارتتى.

سوڭعى رەت رەكوردتىق كورسەتكىشتى 1987 -جىلى توكيودا زويا يۆانوۆا ورناتقان، دەپ حابارلايدى قازاقپارات ق ر مادەنيەت جانە سپورت مينيسترلىگىنە سىلتەمە جاساپ.

ك س ر و ەڭبەك سىڭىرگەن سپورت شەبەرى زويا يۆانوۆانىڭ ول كەزدەگى كورسەتكىشى - 2:27:57 بولعان. ال، جاننا ماماجانوۆا 42 شاقىرىم 195 مەتر قاشىقتىقتى 2:26:54 ۋاقىتتا كەسىپ، روتتەردام مارافونىنىڭ قولا جۇلدەسىن جەڭىپ الدى.

«مارافون ويداعىداي ءوتتى. جۇگىرۋ بارىسىندا قارقىندى ءبىرقالىپتى ۇستاۋعا تىرىستىم. قازاقستان رەكوردىن جاڭارتۋدى الدىن الا جوسپارلادىم. ول ءۇشىن ماعان ءاربىر شاقىرىمدى 3:30 مينۋتتا ءوتۋ كەرەك بولدى. جۇگىرىپ كەلە جاتىپ، ايەلدەر اراسىندا شامامەن «توپ-8»، «توپ-7» قاتارىندا بولاتىن شىعارمىن دەپ ويلادىم. ءبىراق، سوڭعى شاقىرىمداردا كەنيالىق ەكى قىزدى بايقادىم. مارەنى كەسكەندە دە ءوزىمنىڭ ءۇشىنشى بولىپ كەلگەنىمدى بىلمەدىم. مەن ءۇشىن باستىسى، ءىرى حالىقارالىق دودادا ەل رەكوردىن جاڭارتۋ بولدى»، - دەيدى قازاقستاندىق جەلاياق جاننا ماماجانوۆا.

بۇل مارافون 1981 -جىلدان بەرى ءداستۇرلى تۇردە وتەدى. الەمنىڭ ۇزدىك ون مارافونى قاتارىنا كىرەدى. بيىل وندا 13 مىڭنان اسا اتلەت باق سىناعان. جاننا ماماجانوۆا – ق ر قورعانىس مينيسترلىگى ورتالىق سپورت كلۋبىنىڭ سپورتشىسى. ۆەدومستۆو مالىمەتىنشە، روتتەردامداعى جەتىستىگى سپورتشىعا 15-24 شىلدە ارالىعىندا ورەگوندا (ا ق ش) وتەتىن جەڭىل اتلەتيكادان الەم چەمپيوناتىنا قاتىسۋعا مۇمكىندىك بەردى. ايتا كەتەيىك، ەلىمىزدە قازىر سپورت ينفراقۇرىلىمىن دامىتۋدىڭ 2025 -جىلعا دەيىنگى كەستەسى ازىرلەنىپ جاتىر.