ماڭعىستاۋدا قويدى قىناداي قىرعان 35 يت اتىلدى
اۋىل اكىمىنىڭ تاپسىرماسىمەن يتتەردى اۋلاۋعا ماماندار كىرىسكەن بولاتىن. وسى ۋاقىتقا دەيىن 35 يت اتىلىپتى. سايىن شاپاعاتوۆ اۋىلى اكىمدىگىنىڭ باس مامانى ەركەبۇلان جانىبەكتىڭ ايتۋىنشا، اتىلعان يتتەر تەكسەرىلگەن. ءبىرىنشى بەلگىلەرى مەن مال دارىگەرىنىڭ سيپاتتاماسى بويىنشا ولار قۇتىرۋ اۋرۋىنا شالدىقپاعان. تەك اشتىقتان وسىلاي قوراداعى مالعا شابۋىلداعان دەگەن بولجام بار.
سايىن شاپاعاتوۆ پەن اقشۇقىر اۋىلىندا جىلىنا 2 رەت 1000-1500 يت اتىلادى. سوندىقتان بۇل ماسەلە وزەكتى. بيىل 2000 عا جۋىعى اتىلعان. ءتۇپقاراعان اۋدانى بويىنشا جىل سايىن 3-4 ميلليون تەڭگە بولىنەدى. بيىل بۇل قارجى كوبەيمەك. سوندا دا قاڭعىعان يتتەر ازايماي تۇر.
قازىر تۇرعىنداردىڭ جالپى شىعىندارى ەسەپتەلىپ جاتىر. ءىستىڭ ءمان- جايى انىقتالعان سوڭ ولارعا وتەماقى قاراستىرىلۋى مۇمكىن.
اۆتور: ايگەرىم اشىقبايەۆا