شەتەلدەگى قازاقءتىلدى ب ا ق- قا شولۋ: قازاق بالۋانى موڭعوليانىڭ «لاشىن» اتاعىن اراعا 35 جىل سالىپ جەڭىپ الدى

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

 موڭعوليانىڭ «لاشىن» اتاعىن اراعا 35 جىل سالىپ جەڭىپ العان قازاق - KAZNEWS

موڭعوليالىق KAZNEWS اقپاراتتىق پورتالى موڭعوليا حالىق توڭكەرىسىنىڭ 96 جىلدىعىنا ارنالعان ۇلتتىق مەرەكەدە بالۋاندار اراسىنداعى سىنعا تۇسكەن قانداسىمىز سەرىك بەردىمۇرات ۇلى «لاشىن» اتاعىن جەڭىپ العانى تۋرالى جازادى.

«ۇلتتىق مەرەكەدەگى «نادام» تويىندا بايان- ولگي ايماعىنىڭ تۋماسى سەرىك بەردىمۇرات ۇلى بەلگىلى موڭعول بالۋانى ت. ءبااسانحۇۇدى جىعىپ، مەملەكەتتىك «ناچين» (لاشىن) اتاعىنا يە بولدى. وسىلايشا موڭعوليا ەلىنىڭ جاقىندا سايلانعان جاڭا پرەزيدەنتى حالتمااگيين باتتۋلگا مىرزانىڭ ارنايى جارلىعىمەن ب. سەرىكتىڭ مەملەكەتتىك «لاشىن» اتاعىن العانى جاريا بولدى. ايتا كەتەيىك، سەرىك وتكەن جىلى وسى جارىستىڭ بەسىنشى كەزەڭىندە موڭعوليا چەمپيونى ە. ويۋۋنبولدكە جول بەرگەن بولاتىن»، - دەپ جازادى اتالعان سايت.

 

موڭعوليا مەملەكەتىندە اسا بەدەلدى سانالاتىن جارىستا توپ جارعان سەرىك بەردىمۇرات ۇلىنىڭ بۇل جەڭىسىن حالىق ەرەكشە قۋانىشپەن قابىلداپ جاتىر. سول قاتاردا بايان- ولگەي ايماعى قۇرىلتايىنىڭ ءتوراعاسى باۋىرجان دالەل ۇلى دا ulgiinews.mn سايتىندا ءوز قۇتتىقتاۋىن جولداعان.

«اسسالاۋماعالەيكۇم ارداقتى اعايىندار! كەشە عانا عۇن ەلىنىڭ 2226، ۇلى موڭعول مەملەكەتىنىڭ 811، حالىق توڭكەرىسى ورناۋىنىڭ 96 جىلدىق مەرەي تويىنا ارنالعان ۇلتتىق «نادام» تويىن ەستە قالارلىقتاي ۇرپاقتان ۇرپاققا اڭىز بولىپ جەتەرلىكتەي دارەجەدە اتاپ وتتىك. بيىلعى توي ايماعىمىزدىڭ تاريحىندا قالاتىن ەرەكشە توي بولدى. ەلىمىزدىڭ تۇكپىر- تۇكپىرىنەن جيىلعان 512 اتان جىلىك بالۋاندار بەلدەسكەن سايىستان، حالقىمىزدىڭ كوڭىلىن كولدەي شالقىتىپ اراعا 35 جىل سالىپ مەملەكەتتىك «ناچين» دەگەن قۇرمەتتى اتاققا بەردىمۇرات ۇلى سەرىك قول جەتكىزدى. ا ا ءو ح- نىڭ اتىنان جانە ايماعىمىزدىڭ بارلىق حالقى اتىنان شىنايى العىس ايتامىن!»، - دەيدى قۇتتىقتاۋىندا.

 سەرىك بەردىمۇرات ۇلى - 1994 -جىلى موڭعول ەلىنىڭ باي- ولكە ايماعىندا دۇنيەگە كەلگەن. ول سپورتپەن ون جاسىنان بەرى شۇعىلدانادى. سۋمو، سامبو، موڭعول كۇرەسى جانە دزيۋ- دومەن اينالىسادى. كوپتەگەن جارىستاردىڭ جەڭىمپازى. اتاپ ايتقاندا: سامبو كۇرەسىنەن جاسوسپىرىمدەر اراسىندا الەم چەمپيوناتىنىڭ ەكى دۇركىن (2010 جانە 2011) قولا جۇلدەگەرى، جاسوسپىرىمدەر اراسىندا سۋمو كۇرەسىنەن جاپونيا اشىق چەمپيوناتىنىڭ (2011) قولا جۇلدەگەرى جانە جاستار اراسىندا الەم چەمپيونى (گونكونگ، 2012). موڭعولدىڭ ۇلتتىق كۇرەسىنەن جاستار اراسىندا ەل چەمپيونى (2012, 2014) جانە «ايماق ارىستانى» (2013). دزيۋدودان جاسوسپىرىمدەر اراسىندا موڭعوليا چەمپيونى (2009) جانە ەرەسەكتەر اراسىندا (2014) كۇمىس مەدال يەگەرى. قازاقشا كۇرەستەن 2012 -جىلى شىمكەنت قالاسىندا ۇيىمداستىرىلعان قاجىمۇقان تۋرنيرىنىڭ جەڭىمپازى ءارى «ەۋرازيا بارىسىنىڭ» (2013) كۇمىس جۇلدەگەرى اتانعان تالانتتى قازاق ۇلانى.

ەستەرىڭىزگە سالا كەتەيىك، موڭعول كۇرەسىنىڭ ءوز جورالارى، ەرەجەلەرى جانە وزىنە ءتان ەرەكشەلىكتەرى بار: سالماققا قارامايدى، كۇرەس اشىق الاڭدا وتەدى. تابانى مەن بىلەزىككە دەيىن قولىنان باسقا دەنە مۇشەسى كىمدىكى ءبىرىنشى جەرگە تيسە، سول پالۋان جىعىلعان بولىپ ەسەپتەلەدى.«نادام» ۇلتتىق مەيرامىندا 512 دەن 1024-بالۋانعا دەيىن كۇرەسەدى. جۇپ بولىپ كۇرەسىپ، جەڭىلگەندەر جارىستان شىعىپ وتىرادى. ءار دەڭگەيدەن وتكەن سايىن ارنايى ماراپاتقا يە بولادى. «ناچين» - «سۇڭقار- لاشىن» - بەس تۋر بويىنشا جەڭىسكە جەتسە؛ «حارتساگا» - «قارشىعا» - التى تۋرداعى جەڭىس ءۇشىن؛ «زاان» - «ءپىل» - جەتى تۋرداعى جەڭىس ءۇشىن؛ «گارد» - «قاسيەتتى قۇس» - سەگىز تۋر بويىنشا جەڭىسكە جەتسە؛ «ارسلان» - «ارىستان» - توعىز تۋر بويىنشا («ارىستان» اتاعى بار پالۋانعا بەرىلەدى)؛ «اۆارگا» - «بايتەرەك» ون تۋر بويى جەڭىسكە جەتۋ ءۇشىن بەرىلەدى؛ 1024 بالۋان كۇرەسەتىن سوڭعى تۋردا جەڭىسكە جەتكەن ادام وسى مارتەبەگە يە بولماق. بۇگىندە موڭعوليا قازاقتارىنىڭ اراسىنان شىققان قانداسىمىز باقىت ودىناي ۇلى 1981 -جىلى وسى «نادامداعى» بەس بىردەي جەڭىسىنەن كەيىن «مەملەكەت سۇڭقارى» اتاعىن العان.

كەبەنەك كيگەن نەگە كەلەدى دەيمىز - «تارباعاتاي اقپارات» سايتى

 قىتايلىق kztcxw.cc سايتىندا باقىتبەك قۇمارحاجى ۇلىنىڭ «كەبەنەك كيگەن نەگە كەلەدى دەيمىز» اتتى ماقالاسى جارىق كوردى.

اتالعان ماقالادا اۆتور ۇلتىمىزدىڭ كونە كيىم ءتۇرى «كەبەنەك» تۋرالى جازادى. بۇل كيىمنىڭ ەرتە كەزدە حالىق تۇرمىسىندا قانداي ورتادا قولدانىلعانى باياندالىپ، ەل اۋزىندا كوپ ايتىلاتىن «كەبەنەك كيگەن كەلەدى، كەبىن كيگەن كەلمەيدى» دەيتىن ءسوزدىڭ استارىنا ۇڭىلەدى.

 
«قازاق حالقىندا كەڭ تاراعان، ەجەلدەن بەرى كەلە جاتقان «كەبەنەك كيگەن كەلەدى، كەبىن كيگەن كەلمەيدى» دەيتىن جۇباتۋ ءسوزى كوپ ايتىلادى. كەبىن دەگەن بارشا قازاق بالاسىنا تۇسىنىكتى بولار، ول نەگىزىنەن ادام قايتىس بولعاننان كەيىن جەرلەۋ الدىنداعى كيگىزەتىن ەڭ سوڭعى كيىمى. ال، «كەبەنەك» دەگەن قانداي كيىم؟ كەبەنەك - بۇتىندەي جاڭا باسىلعان كيىزدەن تىگەتىن كيىم. ول ەكى ءتۇرلى تىگىلەدى. ءبىرى باسىنداعى كۇلاپاراسىنان تارتىپ، اياقتاعى بايپاعىنا دەيىن ءبىر تۇلعا ەتىپ تىگىلەدى. بەلۋاردان تومەن شالبار ۇلگىسىندە بولىپ، اياقتاعى بايپاعىمەن جالعاسادى. ال، جوعارعى جاعى ىشىك ۇلگىسىندە بولىپ، وندا تۇيمە بولمايدى، ءار جەرىندە بايلايتىن ءجىبى بولادى نەمەسە قاۋسىرىنىپ جاتا بەرەدى. بۇل كيىمدى كيىمنىڭ سىرتىنان كيە بەرەدى. ال تاعىءبىر ءتۇرى باسىندا كۇلاپاراسى بار ۇزىن شاپان ۇلگىسىندە، بايپاعى بولەك تىگىلەدى. كەبەنەك كيگەن ادام سۋىقتان قورىقپايدى، كەز كەلگەن جەرگە شەشىنبەي جاتا كەتسە توسەنىش تە، جامىلعى دا كەرەك ەمەس. سوندىقتان قىستىڭ قاقاعان ايازدارىندا عانا كيىلەتىن كيىم بولعان. جىلقىشى، جوقشىلار، ۇزاق ساپار شەككەندەر، جورىقتا تۇنگى كۇزەتكە شىعاتىن اسكەرلەر كوپ پايدالانعان»، - دەپ جازادى اۆتور.

 اتالعان ماقالادا اۆتور كەبەنەكتى جايشىلىق ۋاقىتتاردا جىلقىشىلاردىڭ كوپ پايدالانعانى تۋرالى ارنايى توقتالىپ جازادى. «ءتورت تۇلىك مالدىڭ ىشىندە ەڭ قيىنى جىلقى كۇزەتى بولسا كەرەك. جىلقىشىلار كۇندىز كەزەك- كەزەك جىلقى جايسا، تۇندە كەبەنەك كيىپ، جىلقىلاردى كوزدەن تاسا قىلماي كۇزەتىپ وتىرعان. بۇل كيىم كيىزدەن تىگىلگەندىكتەن وتە اۋىر كەلدى دە، جىلقىشىلار كوپ جىلقىنىڭ ىشىندەگى جىرا سالىپ تويىنعان، كۇشتى ايعىرلاردى عانا مىنەتىن بولعان. جىلقى مالى ءبىر جەردە تۇراقتاپ تۇرمايدى، كەيدە ۇركەدى، كەيدە بوراننان ىعادى، سول سەبەپتەن دە سەمىز ايعىر كەبەنەك كيگەن جىلقىشىنىڭ ءمىنىس كولىگىنە ازەر جاراعان»، - دەپ جازادى.

 ماقالا سوڭىندا اۆتور كەبەنەك تۋرالى حالىق اراسىندا ايتىلاتىن ناقىل سوزدەرگە تالداۋ جاساپ، جاقسىلىقتى يشارالايتىن، جۇباتۋ ماعاناسىندا ايتىلاتىن كەبەنەك ءسوزىنىڭ انىق ءمانىن، بولمىسىن تانىپ، بىلۋگە ۇندەيدى.

«ەرتەدەن قازىرگە دەيىن كەبەنەك كيىمى جاقسىلىقتىڭ بەلگىسى رەتىندە سانالىپ، «كەبەنەك كيگەن ادام قايدا كەتسە دە تۇبىندە ءبىر كەلەدى»، دەيتىن جاقسى لەپەس ءسوز سانامىزدا جاتتالىپ قالعان. ماسەلەن: ادامدار ۇزاق جەرگە جولاۋشى جۇرگەندە، جاستار الىسقا وقۋعا اتتانعاندا جاقىندارى الاڭداپ، قيماستىق تانىتىپ كوڭىلى بوساسا، اۋىل اقساقالدارى «جاقسىلىققا قۋانىڭدار، ول كەبەنەك كيىپ بارادى ەمەس پە» دەپ جۇباتۋ ايتىپ جاتادى. كەيبىر وتباسى «كەبەنەك كيگەننىڭ تويىن جاساپ جاتىرمىز» دەپ ۇلان- اسىر توي جاسايتىن دا بولعان. ادامدارى جوعالىپ قايتا تابىلسا، سىرقاتتانىپ ۇزاق جەرگە بارىپ جازىلسا، بەلگىلى سەبەپپەن، جەر اۋدارىلىپ قايتا ورالسا، تۋىس- تۋعاندارىمەن قايتا قاۋىشسا، جاۋ قولىنان قاشىپ شىقسا، اۋىلداعى ۇلكەندەر جينالىپ كەلىپ قۇتتى بولسىن ايتىپ، «ولمەگەن قۇل، التىن اياقتان سۋ ىشەر»، «قىرىق جىل قىرعىن بولسا دا، اجالى جەتكەن ولەر»، «كەبەنەك كيگەن كەلەدى، كەبىن كيگەن كەلمەيدى» دەپ قۋانىشتارىنا ورتاق بولىپ، اق باتالارىن بەرىپ جاتادى. ءبىز حالقىمىزدىڭ تۇرمىسىندا كەڭ قولدانىلعان، قازىردىڭ وزىندە ءسوز اراسىندا ءجيى ايتىلىپ جۇرگەن كەبەنەكتىڭ قانداي كيىم ەكەندىگىن، وزگە كيىمنەن ارتىقشىلىعىن، قاسيەتىن بۇگىنگى ۇرپاق ءتۇسىنىپ، بىلە جۇرسە دەگەن نيەتتەمىز»، دەپ تۇيىندەيدى.

 قىرعىز ەكونوميكاسى ءوستى - ت ر ت اگەنتتىگى

 قىرعىز ەكونوميكاسى بيىلعى جىلدىڭ جارتىسىندا 6,4 پايىز ءوستى، دەپ حابارلايدى تۇركيا راديو تەلەديدار اگەنتتىگى سايتى.

ۇلتتىق ستاتيستيكا كوميتەتى ءتوراعاسىنىڭ ءبىرىنشى ورىنباسارى ازامات وروسبايەۆ باسپا ءسوز بريفينگىن وتكىزىپ، 2017 -جىلدىڭ العاشقى جارتىسىندا قىرعىزستاننىڭ ۇلتتىق تابىسىنىڭ 194 ميلليارد سوم (2 ميلليارد 832 ميلليون 788 دوللار) بولعانىن ءبىلدىردى.

 وروسبايەۆ قىرعىز ەكونوميكاسىنىڭ جىلدىڭ العاشقى جارتىسىندا 6,4 پايىز وسكەنىن، ونەركاسىپ ءوندىرىسىنىڭ 31,6 پايىز ارتقانىن ايتتى. ينفلياتسيانىڭ 2,8 پايىز بولعانىن تىلگە تيەك ەتتى. ەلدە ازىق- تۇلىك، كارتوپ، الما جانە كوكونىس توبىنداعى ونىمدەردىڭ باعاسى ەكى ەسە ارتتى. سۇيىق مايدىڭ باعاسى 3 پايىز، داقىل باعاسى 6, كۇرىشتىڭ باعاسى 2,6 پايىز، جۇمىرتقا 9,5 جانە ءسۇت ونىمدەرىنىڭ باعاسى 7,3 پايىز ارزاندادى.

نۇرسۇلتان نازاربايەۆ موڭعوليا پرەزيدەنتىن ەلىنە رەسمي ساپارمەن كەلۋگە شاقىردى - KAZNEWS

قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ موڭعوليا پرەزيدەنتى حالتمااگيين باتتۋلگانى ەلىنە رەسمي ساپارمەن كەلۋگە شاقىردى. بۇل جونىندە ق ر- نىڭ پرەزيدەنتىنىڭ موڭعوليا پرەزيدەنتىنە جولداعان قۇتتىقتاۋ حاتىندا ايتقان، دەپ جازادى موڭعوليالىق KAZNEWS اقپاراتتىق پورتالى.

قۇتتىقتاۋ حاتتا ن. نازاربايەۆ مەملەكەتتەر اراسىنداعى دوستىق قارىم- قاتىناس پەن تىعىز ىنتىماقتاستىقتى حالىقتار يگىلىگى ءۇشىن ءارى قاراي تەرەڭدەتۋ جولىندا بىرگە كۇش - جىگەر جۇمساۋعا دايىن ەكەنىن ءبىلدىردى. قازاقستان پرەزيدەنتى ح. باتتۋلگاعا جاۋاپتى قىزمەتىندە مول تابىس، موڭعوليا حالقىنا بەيبىت ءومىر جانە گۇلدەنۋ تىلەي وتىرىپ، ارىپتەسىن قازاقستانعا ساپارمەن كەلىپ قايتۋعا شاقىرعان.

قازاقستان قىرعىزستانعا 100 ميلليون دوللار ينۆەستيتسيا سالادى - «فارس» اقپارات اگەنتتىگى

قازاقستان ەۋرازيالىق ەكونوميكالىق وداعىنىڭ كەدەندىك ينفراقۇرىلىمىن سالىپ، قىرعىزستاننىڭ سانيتارلىق، فيتوسانيتارلىق جانە ۆەتەرينارلىق جۇيەلەرىن نىعايتۋ ءۇشىن ينۆەستيتسيا سالادى، دەپ جازادى parstoday اقپارات اگەنتتىگى.

«فارس» حابار اگەنتتىگىنىڭ مالىمەتى بويىنشا قازاقستان پرەزيدەنتى نۇرسۇلتان نازاربايەۆ قىرعىزستانمەن ەۋرازيالىق ەكونوميكالىق وداق شەڭبەرىندە ەكىجاقتى ەكونوميكالىق سەرىكتەستىكتەرگە قاتىستى زاڭعا قول قويدى.

 وسى زاڭعا سايكەس، قازاقستان ۇكىمەتى قىرعىزستاننىڭ كەدەن سالاسى مەن وسى ەلگە ۆەتەرينارلىق لابوراتوريالار سالۋ ءۇشىن 100 ميلليون دوللار كولەمىندە ماتەريالدى كومەك كورسەتەدى. ماتەريالدى كومەك بىرتىندەپ جىبەرىلەدى. تاراپتار بولىكتەردىڭ ءارقايسىنا جەكە تەحنيكالىق كومەك پروتوكولىن دايىنداپ، قول قويىپ، بەكىتەدى. پروتوكولدارعا سايكەس، ماتەريالدى كومەك اقشا، قۇرال- جابدىق، تاۋار، ونىمدەر مەن وقىتۋ قىزمەتتەرى تۇرىندە ۇسىنىلادى.

 التايدا بالۋان سەرىك قوجاباي ۇلى اتىنداعى تۋرنير ءوتتى - «التاي اقپارات» سايتى

 قىتاي مەملەكتتىك بالۋاندار جارىسىنىڭ ءۇش مارتە چەمپيونى سەرىك قوجاباي ۇلىنىڭ جۇلدەسىنە ارنالعان جاسوسپىرىمدەر اراسىنداعى ايماقتىق تۋرنير ءوتتى، دەپ حابارلايدى altxw.com سايتى.

 سەرىك قوجاباي ۇلى اتىنداعى ءداستۇرلى ءوتىپ كەلە جاتقان 10- كەزەكتى تۋرنيرگە التاي ايماعىنىڭ 6 اۋدان 1 قالاسىنان جينالعان جاس بالۋاندار قاتىستى. ق ح ر التاي ايماعىنىڭ قابا اۋدانىندا وتكىزىلگەن بالۋاندار جارىسىندا 33 كيلوگرام مەن 85 كيلوگرام ارالىعىنداعى 100 جاس بالۋان 10 سالماق دارەجەسى بويىنشا بەلدەستى. ەكى كۇنگە جالعاسقان جارىس بارىسىندا جۇلدەلى بالۋاندار مەن ۇزدىك ورىندار باعالاندى. ەرەكشە كوزگە تۇسكەن قابا اۋدانىنىڭ 53 كيلوگرام سالماقتاعى جاس بالۋانى ەرسىن قاۋان ۇلى ءوز سالماق دارجەسىندە باس جۇلدەنى قانجىعالادى.

سەرىك قوجاباي ۇلى - (1936-1994) ق ح ر التاي ايماعى قابا اۋدانىندا دۇنيەگە كەلگەن. 1954 -جىلى قىتايدىڭ مەملەكەتتىك ءبىرىنشى رەت وتكىزىلگەن بالۋاندار باسەكەسىندە باس جۇلدەنى ەنشىلەگەن. وسىدان كەيىن قاتارىنان ءۇش مارتە ەل چەمپيونى اتانعان.

شىڭعىس حان كەسەنەسىنىڭ وردوستا تۇرعىزىلۋىنىڭ سىرى نەدە - قىتايدىڭ «ورتالىق حالىق راديوسى» (CNK)

قىتايلىق kazakcnr.com سايتىندا گۇلجان زارقىنبەك قىزىنىڭ «شىڭعىس حان كەسەنەسىنىڭ وردوستا تۇرعىزىلۋىنىڭ سىرى» اتتى ماقالاسى جارىق كوردى.

اۆتور ماقالاسىندا قىتاي حالىق رەسپۋبليكاسى ىشكى موڭعول اۆتونوميالىق ولكەسىنىڭ وردوس قالاسىنا ورىنالاسقان شىڭعىس حان كەسەنەسىنىڭ تاريحىنان سىر شەرتىپ، سوندا ساقتالعان ۇلى حاننىڭ قۇندى جادىگەرلەرى تۋرالى بايان ەتەدى.

 «ق ح ر ىشكى موڭعول اۆتونوميالىق ولكەسىنىڭ وردوس قالاسىنا ورنالاسقان شىڭعىس حاننىڭ تاساتتىق بەرۋ كەسەنەسى - موڭعول حالقى شىڭعىس حاننىڭ رۋحىنا تابىنىپ، تىلەك تىلەپ، مەدەت سۇرايتىن ورىن. ولاردىڭ جۇرەگىندە شىڭعىس حاننىڭ رۋحى ساقتالعان ورىن ونىڭ قابىرىمەن پارا- پار. ەندەشە بۇل كەسەنە نە ءۇشىن وسىنشاما زور قۇرمەتكە يە؟ وردوس قالاسى شىڭعىس حان دۇنيەگە كەلگەن دە، دۇنيەدەن وتكەن دە جەر ەمەس. ال ونىڭ رۋحى نە ءۇشىن وسى ارادا ساقتالعان دەيمىز؟»، - دەپ جازعان اۆتور ماقالاسىندا وسى ساۋالدارعا تاريحي دەرەكتەرگە سۇيەنە وتىرىپ جاۋاپ ىزدەيدى.

 اتالعان ماقالادا وردوستاعى تاعانى ەرتە كەزدە قالانعان كيەلى ورىنعا 1956 -جىلى جاڭا كەسەنە تۇرعىزىلعانى جازىلعان. ال وسى وردوس جەرىندە زامانىندا ۇلى حاننىڭ قانداي قۇندى جادىگەرلەرى ساقتالعان؟

«... وردوس قالاسىنداعى شىڭعىس حان كەسەنەسىنىڭ بۇرىنعى اتى شىڭعىس حاننىڭ سەگىز اق ورداسى. 1227 -جىلى شىڭعىس حان قايتىس بولعاندا اق وردا تىگىلىپ، شىڭعىس حان جان ۇزەردەگى اقتىق تىنىسى تيگەن تۇيەنىڭ شۋداسى جانە ەرتوقىمى قاتارلى زاتتار قويىلىپ، كۇللى موڭعول حالقى تابىناتىن ەڭ ۇلى قاسيەتتى جەر بولادى. 15-عاسىردا وردوستىڭ يجينكۇرە دەگەن جەرىندە ياعني قازىرگى شىڭعىس حان كەسەنەسىنىڭ ءدال ورنىندا شىڭعىس حاننىڭ بايبىشەسى بورتەنىڭ، كىشى ايەلى قۇلاننىڭ زاتتارىن، سونداي- اق، شىڭعىس حاننىڭ ەرتوقىمىن، ساداعىن، ءسۇت شەلەگىن، قاسيەتتى تۇلپارىن، قۇندى ارحيۆتەرىن جيناقتاپ، سەگىز وردا تىگىپ ولاردى جەكە جەكە ورنالاستىرادى. «وردوس» دەگەن سوزدەگى «وردو» قازاق تىلىندە وردا دەگەن ماعىنانى بىلدىرەدى. ال «س» كوپتىك جالعاۋ. وسىلايشا «وردوس» قازاقشا «كوپ وردا» دەگەن ماعىنادا. ەندەشە شىڭعىس حاننىڭ جادىگەرلەرى ساقتالعان سەگىز وردانىڭ وردوس اتالۋىنداعى ءبىر سەبەپ وسى بولسا كەرەك»، - دەپ جازىلعان ماقالادا.

 اۆتور: باقىتجول كاكەش