مۋزىكالىق اسپاپ بۇگىن سكريپكاشىنىڭ قىزدارىنا قايتارىلادى، دەپ حابارلادى ت ا س س Associated Press اگەنتتىگىنە سىلتەمە جاساپ.
1734-جىلى اتاقتى يتالياندىق شەبەر انتونيو ستراديۆاري جاساعان سكريپكا توتەنبەرگتىڭ كابينەتىنەن 1980-جىلى امەريكاندىق كەمبريدج قالاسىنداعى مۋزىكا مەكتەبىندە ول بەرگەن كونسەرتتەن كەيىن جوعالىپ كەتكەن بولاتىن. وقىتۋشى اسپاپتىڭ جوعالۋىنا سكريپكانىڭ قاسىندا اينالشىقتاپ جۇرگەن جاس مۋزىكانت فيليپ دجونسوننان كۇدىكتەنگەن، ءبىراق تا ناقتى دالەلى بولماعان.
دجونسون 2011-جىلى قايتىس بولدى، سكريپكانى ارنايى قابىنا سالىپ كىلتتەپ، بۇرىنعى ايەلىنە بەرىپ كەتكەن. ول بىرنەشە جىل بويى ونىڭ كىلت كودىن بىلە الماي، بيىل عانا اشىپ، ونى باعالاۋشىعا الىپ بارعان. ال باعالاۋشى ونى تانىپ، سول بويدا ف ب ق- نىڭ ۇرلانعان ونەر شىعارمالارىن ىزدەۋمەن اينالىساتىن بولىمىنە حابارلاعان.
بوستون ۋنيۆەرسيتەتىنىڭ پروفەسسورى رومان توتەنبەرگ 2012- جىلى 101 جاسىندا قايتىس بولدى. ونىڭ ءۇش قىزىنىڭ ءبىرى نينا توتەنبەرگ اكەسىنىڭ ۇرلانعان سكريپكانى كوپ ءسوز ەتپەگەنىن ايتادى، ويتكەنى مۋزىكانت ءۇشىن ول وتباسىنىڭ ءبىر مۇشەسىنەن ايىرىلۋمەن بىردەي ەدى.
Associated Press اقپاراتىنا قاراعاندا توتەنبەرگتىڭ قىزدارى ستراديۆاريدىڭ سكريپكاسىن ساتۋعا شىعارماق، ءبىراق تا بۇل اسپاپتىڭ وندا ويناي الاتىن ادامنىڭ قولىنا تۇسكەنىن قالايدى.