مۇناي باعاسى 35 دوللارعا دەيىن قۇلدىراۋى مۇمكىن
05:33, 10 - قاڭتار 2015
استانا. قازاقپارات - الەمدىك نارىقتاعى مۇناي باعاسى 35 دوللارعا دەيىن قۇلدىراۋى مۇمكىن. بيرجاداعى ساراپشىلار وسىنداي بولجام جاساپ وتىر. سەبەبى سوڭعى كۇندەرى ىشىندە قارا التىننىڭ ءبىر باررەلى 50 دوللاردان 47 دوللار 50 سەنتكە دەيىن ارزانداپ ۇلگەردى.
بۇل «Brent» ماركاسىنا قاتىستى كورسەتكىش. ال سولتۇستىك امەريكالىق WTI مۇنايى قازىر بۇدان دا ارزان باعاعا ساۋدالانۋدا. بولجام بويىنشا ونىڭ قۇنى 35 دوللارعا دەيىن ءتۇسۋى مۇمكىن. ساراپشىلار بۇل وزگەرىس سۇرانىستىڭ ازايىپ، ءوندىرىستىڭ كوبەيگەندىگىمەن بايلانىستىرۋدا.
سونىمەن قاتار قاراشا ايىندا قابىلداعان قاۋلى دا كەرى اسەر ەتۋدە. وندا مۇناي ەكسپورتتاۋشى مەملەكەتتەردىڭ ۇيىمى - و پ ە ك كەز كەلگەن جاعدايعا قاراماستان قارا التىندى ءوندىرۋ كولەمىن ازايتپاۋ جايلى كەلىسكەن ەدى. اراب ەلدەرى مۇناي قۇنى 30 دوللارعا دەيىن تۇسسە دە، ەكسپورتتى توقتاتپايمىز دەپ وتىر. بۇدان ەكونوميكاسى مۇناي ەكسپورتىنا تاۋەلدى مەملەكەتتەر قاتتى زارداپ شەگۋى مۇمكىن.
www.ktk.kz