قاراعاندى وبلىسىندا قازىبەك ءبيدىڭ 350 جىلدىق مەرەيتويى اتاپ وتىلەدى

استانا. قازاقپارات - بيىل قازىبەك بي بابامىزدىڭ 350 جىلدىق مەرەيتويى قاراعاندى وبلىسىندا وتەدى. اۋقىمدى شارالاردىڭ ءبىرى ەگىندىبۇلاق اۋىلىنان باستاۋ الادى. بۇگىن وبلىستىق اكىمشىلىك تورقالى تويدى جوعارى دەڭگەيدە وتكىزۋ ءۇشىن جوسپارلاۋ جۇمىستارىن تاعى ءبىر تالقىلادى.

تاريحي تۇلعا قاز داۋىستى قازىبەك بي بابامىزدىڭ 350 جىلدىق مەرەيتويى حالىقارالىق دەڭگەيدە اتالىپ وتەدى. ەلىمىزدىڭ بەلسەندى جاستارى باستاعان رەسپۋبليكالىق اۆتوكەرۋەننىڭ قۇرامىنا عالىمدار مەن تاريحشىلار، ارتىستەر مەن دارىگەرلەر دە بولادى. ايماق باسشىلارى اۋقىمدى شارانى ابىرويمەن وتكىزۋدى تاپسىردى.

 جاندوس ابىشيەۆ، وبلىس اكىمىنىڭ ورىنباسارى:

 - وتكەن ءبىرىنشى وتىرىستا ۇسىنىستار مەن ماسەلەلەر كوتەرىلگەن بولاتىن. ءار ءىس- شارا بويىنشا جۇمىس توپتارى قۇرىلدى. بۇگىن ءىس- شارانى جوعارى دەڭگەيدە وتكىزۋ جولدارىن تالقىلاۋعا ادەيى جينالدىق. ەگىندىبۇلاقتان باستالاتىن اۆتوكەرۋەننىڭ سوڭعى توقتايتىن نۇكتەسى تۇركىستان شاھارى بولادى. وندا كەرۋەن مۇشەلەرى تۇركىستاندا وتەتىن جاستار فورۋمىنا قاتىسادى. مەرەيتوي بارىسىندا حالىقارالىق اقىندار ايتىسى وتەدى. وعان موڭعوليا، قىتاي، قىرعىزستاننان ازۋلى اقىندار قاتىسادى. سونىمەن قاتار شەشەندىك ونەر سايىسى دا وتەدى.

 رىمبالا وماربەكوۆا؛ قوعام قايراتكەرى:

- بۇل شارا وتە قاجەت. وعان قوسا بيىل ەلباسىنىڭ «بولاشاققا باعدار: رۋحاني جاڭعىرۋ» دەگەن ماقالاسى شىقتى. قازىبەك ءبيدىڭ 350 جىلدىعىنا وراي 300 بەتتىك البوم مەن ەكى تومدىق كىتاپ جارىققا شىعادى. وبلىستىق مۇراجايدا قىركۇيەكتىڭ 20-سىنان باستاپ كورمە وتەدى. اتاقتى ءبيدىڭ ءومىرى مەن وسكەن ورتاسىنان مول ماعلۇمات بەرەتىن كورمە ءبىر اي بويى جالعاسادى.

www.24.kz