3,5 مىڭعا جۋىق شەتەلدىككە ەلگە كىرۋگە تىيىم سالىندى - ۇ ق ك
استانا. قازاقپارات - 2025 -جىلدىڭ باسىنان بەرى تەرروريزمگە قاتىسى بار دەگەن كۇدىكپەن 3,5 مىڭعا جۋىق شەتەلدىككە ەلگە كىرۋگە تىيىم سالىندى. تەرروريستىك قىزمەتكە قاتىسى بار 246 شەتەلدىك قازاقستانعا كىرۋگە تالپىنعانىمەن، جولى كەسىلدى. بۇل تۋرالى ۇ ق ك ءتوراعاسى ەرمەك ساعىمبايەۆ Kazinform اگەنتتىگىنە ەكسكليۋزيۆتى سۇحباتىندا اتاپ ءوتتى.
- حالىقارالىق تەرروريستىك جانە ءدىني- ەكسترەميستىك ۇيىمدار قازاقستاندىقتاردى راديكالدى يدەولوگياعا تارتۋ ءۇشىن جاساپ جاتقان امالدارىن توقتاتار ەمەس. كەيبىر ازاماتتار دەسترۋكتيۆتى ۇگىت-ناسيحاتتىڭ ىقپالىنا ءتۇسىپ، تەرروريزم مەن ءدىني ەكسترەميزم يدەولوگياسىنا بەيىم بولدى. ادەتتە بۇل شەتەلدىك ىقپال سانالادى، كوبى ينتەرنەت ارقىلى جۇزەگە اسادى.
ۇلتتىق قاۋىپسىزدىك كوميتەتى ءۇشىن تەرروريزممەن كۇرەس جانە ەلدە تەرروريستىك نەمەسە باسقا دا كۇش قولدانۋ اكتىلەرىنە جول بەرمەۋ - باسىم باعىتتىڭ ءبىرى.
مىسالى، بيىل اقتوبە، اتىراۋ وبلىسى مەن شىمكەنت قالاسىندا تەرروريزمدى ناسيحاتتاعانى، تەرروريستىك قىزمەتكە ادام تارتقانى جانە اتىس قارۋىن زاڭسىز ساقتاعانى ءۇشىن ءبىرقاتار ازاماتتار سوت ۇكىمىمەن كىنالى دەپ تانىلىپ، ءتۇرلى مەرزىمگە باس بوستاندىعىنان ايىرىلدى.
ولار ءوز اينالاسىنداعى ادامداردى شەتەلدە تەرروريستەر جاعىندا سوعىس قيمىلدارىنا قاتىسۋعا جانە ءدىني سەبەپپەن كۇش قولدانۋعا ۇگىتتەگەن. وزدەرىنىڭ راديكالدى كوزقاراستارىن ينتەرنەتتەگى ەكسترەميستىك ماتەريالداردى زەرتتەۋ ارقىلى نىعايتىپ وتىرعان، - دەدى ەرمەك ساعىمبايەۆ.
وسىنداي قىلمىس بويىنشا بيىلدىڭ وزىندە 59 ادام ۇستالدى جانە 60 تان استام ادام سوتتالدى.
- شەتەلدىك راديكالدار ەلىمىزگە قالاي كەلىپ- كەتەدى، كوشى- قون ارنالارى قانداي، وسىلاردى ىزدەستىرۋ جۇمىستارى ۇيىمداستىرىلدى. 2025 -جىلدىڭ باسىنان بەرى تەرروريزمگە قاتىسى بار دەگەن كۇدىكپەن 3,5 مىڭعا جۋىق شەتەلدىككە ەلگە كىرۋگە تىيىم سالىندى. تەرروريستىك قىزمەتكە قاتىسى بار 246 شەتەلدىك قازاقستانعا كىرۋگە تالپىنعانىمەن، جولىن كەستىك. ءوز ەلدەرىندە تەرروريزم مەن ءدىني ەكسترەميزم ءۇشىن ىزدەۋدە جۇرگەن 16 ادام ۇستالدى. تەرروريزم مەن ءدىني ەكسترەميزم يدەياسىن قولدايتىن 800 گە جۋىق ميگرانت انىقتالىپ، ولاردى ەلدەن شىعارۋ شارالارى قابىلداندى.
راديكالدى يدەيالاردىڭ الدىن الۋ كەڭ اۋقىمدى ۆەدومستۆوارالىق ۇيلەستىرۋدى تالاپ ەتەدى. وسىعان بايلانىستى ۋاكىلەتتى مەملەكەتتىك ورگاندارمەن بىرلەسىپ، تەرروريزم يدەولوگياسىنا قارسى كۇرەس بويىنشا كەشەندى شارالار ىسكە اسىرىلىپ جاتىر. تەرروريزم مەن ەكسترەميزمدى ناسيحاتتايتىن 9 مىڭنان استام ينتەرنەت ماتەريالدار انىقتالىپ، بۇعاتتالدى، - دەدى ول.
ءقازىر ەلىمىزدىڭ انتيتەرروريستىك ورتالىعىنىڭ ۇيلەستىرۋىمەن تەرروريزمگە قارسى ءىس-قيمىلدىڭ جالپىمەملەكەتتىك جۇيەسى قۇرىلىپ، مەملەكەتتىك جانە جەرگىلىكتى اتقارۋشى ورگانداردىڭ جۇمىسى جولعا قويىلدى. قۇقىقتىق جانە ماتەريالدىق-تەحنيكالىق قامتاماسىز ەتۋ جەتىلدىرىلە ءتۇستى.
- جىل باسىنان بەرى 400 دەن استام وقۋ- جاتتىعۋ مەن تەرروريزمگە قارسى دايىندىقتار ۇيىمداستىرىلعان. 95 مىڭنان استام ستراتەگيالىق نىسان قىزمەتكەرلەرىنە تەراكت بولعان جاعدايدا قالاي ارەكەت ەتۋ كەرەگى جونىندە ترەنينگتەر وتكىزىلدى.
ماۋسىم ايىندا قوستاناي وبلىسىندا رەسپۋبليكالىق «نايزا- انتيتەررور-2025» وقۋ-جاتتىعۋىنىڭ قورىتىندى كەزەڭى ءوتتى. وندا تەرروريزمگە قارسى كۇرەستەگى مەملەكەتتىك ورگانداردىڭ «گيبريدتى» قاۋىپ-قاتەرلەرگە قارسى تۇرۋعا دايىندىعى تەكسەرىلدى.
بۇعان قوسا كوميتەت ۇلتتىق مۇددەلەردى، كونستيتۋتسيالىق قۇرىلىستى جانە قوعامدىق قاۋىپسىزدىكتى قورعاۋعا ەرەكشە كوڭىل ءبولىپ وتىر. باسىم باعىتتاردىڭ ءبىرى - ۇلتتىق ەكسترەميزمگە، سەپاراتيزمگە جانە ازاماتتاردى شەتەلدىك قارۋلى قاقتىعىستارعا تارتۋعا قارسى تۇرۋ. قابىلدانىپ جاتقان شارالار دەسترۋكتيۆتى ارەكەتتەرگە جول بەرمەۋگە مۇمكىندىك بەرىپ جاتىر.
قۇقىق قورعاۋ ورگاندارىمەن بىرلەسىپ، ۇلتارالىق ارازدىقتى قوزدىراتىن جانە راديكالدى كوزقاراستى ۇستاناتىن تۇلعالاردى انىقتاۋ بويىنشا جۇمىستار اتقارىلدى، - دەپ اتاپ ءوتتى ۇ ق ك ءتوراعاسى.