35 ادام كوز جۇمدى: قىتايدا ەر ادام كولىكپەن كوپشىلىكتى قاعىپ كەتتى
استانا. KAZINFORM - قىتايدىڭ وڭتۇستىگىندەگى جۋحاي قالاسىندا ەر ادام كولىكپەن كوپشىلىككە سوعىلىپ، 35 ادام قازا تاپتى. 43 ادام اۋىر جاراقات العان. بۇل تۋرالى جەرگىلىكتى پوليتسياعا سىلتەمە جاساپ South China Morning Post حابارلادى.
وقيعا 11-قاراشا، دۇيسەنبى كۇنى كەشكە سپورت ورتالىعىنىڭ جانىندا بولعان. قايعىلى جاعداي كەزىندە ول جەردە سەرۋەندەپ جانە سپورتپەن شۇعىلدانىپ جۇرگەن ادام كوپ بولعان. جاراقات العاندار اراسىندا قارت ادامدار، جاسوسپىرىمدەر جانە بالالار بار.
كولىك تىزگىنىندە 62 جاستاعى ەر ادام وتىرعان. ول قىلمىس ورنىنان قاشىپ كەتۋگە تىرىسقان كەزدە قۇقىق قورعاۋشىلار ونى ۇستاپ العان.
پوليتسيا قىزمەتكەرلەرى ەر ادامنىڭ كولىكتە وتىرعاندا وزىنە پىشاق جاراقاتتارىن سالعانىن انىقتاپ، ونى بىردەن اۋرۋحاناعا جەتكىزدى.
BBC-دىڭ حابارلاۋىنشا، ەر ادامنىڭ ارەكەتىنە اجىراسقاننان كەيىنگى مۇلىكتى بولۋمەن بايلانىستى نارازىلىقتار سەبەپ بولۋى مۇمكىن.
كۇدىكتىگە قاتىستى قىلمىستىق ءىس قوزعالعان.
اۆتور
جاراسقان نۇرىبايەۆ