ەلىمىزدە كۇن سايىن 342 ادام تۇرمىستىق زورلىق-زومبىلىققا ۇشىرايدى
بۇل تۋرالى بالا قۇقىقتارى جونىندەگى ۋاكىل دينارا زاكيەۆا تۇركىستان قالاسىندا ءوتىپ جاتقان باسقوسۋدا مالىمدەدى، دەپ حابارلايدى قازاقپارات ءتىلشىسى.
سوڭعى ۋاقىتتا قوعامنىڭ نازارىن اۋدارىپ، اتا-انالار قاۋىمىن تولعاندىرعان وزەكتى ماسەلەنىڭ ءبىرى بالالارعا قاتىستى زورلىق-زومبىلىق فاكتىلەرىنىڭ كوبەيۋى بولىپ وتىر. سوندىقتان كامەلەتكە تولماعاندارعا قاتىستى قۇقىق بۇزۋشىلىق جايى كۇن تارتىبىندە تۇر. تۇركىستان قالاسىندا وتكەن «قازاقستانداعى بالالارعا قاتىستى زورلىق-زومبىلىقتىڭ الدىن الۋ» تاقىرىبىنداعى دوڭگەلەك ۇستەلگە قاتىسۋشىلار پىكىرىن ايتىپ، قوعامداعى وزەكتى ماسەلەلەردى قوزعادى. بالا قۇقىقتارى جونىندەگى ۋاكىل دينارا زاكيەۆا قازاقستاندا كۇن سايىن 6 بالاعا قاتىستى قىلمىس جاسالاتىنىن جەتكىزدى.
«1-2 بالا كۇن سايىن ءوز-وزىنە قول جۇمسايدى نەمەسە جۇمساۋعا تىرىسادى. كۇن سايىن 342 ادام تۇرمىستىق زورلىق-زومبىلىققا ۇشىرايدى. بالالار اراسىندا 1 كۇندە 5 قىلمىس جاسالادى. بۋللينگ ماسەلەسى دە وزەكتى. جىلىنا 150 بالا تەرەزەدەن قۇلايدى نەمەسە ليۋكتەرگە قۇلاپ كەتىپ جاتىر»، - دەدى ول.
سونداي-اق دينارا زاكيەۆا بالا تاربيەسىمەن اينالىساتىن كادرلاردىڭ دا تاپشى ەكەنىن جەتكىزدى.
«كادرلارعا، ماماندارعا قاتىستى ۇلكەن ماسەلە بار. مىسالى، قازىر 3000 مەكتەپتە الەۋمەتتىك پەداگوگ جوق، ءبىر مەكتەپتە 1 پسيحولوگقا 1500 بالادان كەلەدى. ەلىمىزدە 6,5 ميلليون بالاعا 300 وپەكا ماماندارى جۇمىس ىستەپ جاتىر، ي د ن قىزمەتكەرلەرىنىڭ سانى دا جەتىسپەيدى»، - دەدى ول.
ايتا كەتەيىك، تۇركىستان قالاسىندا «قازاقستانداعى بالالارعا قاتىستى زورلىق-زومبىلىقتىڭ الدىن الۋ» تاقىرىبىندا دوڭگەلەك ۇستەل ءوتىپ جاتىر.