كولىك جۇرگىزۋشىلەرى وتكەن جىلى 33 ميلليارد تەڭگە ايىپپۇل تولەگەن
بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«وتكەن جىلى ىشكى ىستەر ورگاندارى جىلدامدىق رەجيمىن بۇزۋدىڭ 3,1 ميلليون استام دەرەگىن انىقتادى. جاياۋ جۇرگىنشىلەر جول بەرگەن 280 مىڭعا جۋىق قۇقىق بۇزۋشىلىقتىڭ جولىن كەستى. جول ءجۇرىسى قاۋىپسىزدىگىن قامتاماسىز ەتۋدە بۇزۋشىلىقتى تىركەۋدىڭ اۆتوماتتى جۇيەلەرى (بۇدان ءارى – ب ت ا ج) ءوزىنىڭ تيىمدىلىگىن دالەلدەدى. جولداردا بارلىعى 18 مىڭنان استام بتاج ورناتىلدى. ونىڭ كومەگىمەن وتكەن جىلى 5 ميلليون بۇزۋشىلىق انىقتالىپ، مەملەكەت بيۋدجەتىنە ايىپپۇل تۇرىندە 33 ميلليارد تەڭگە ءتۇستى»، - دەپ اتاپ وتەدى ءبىرىنشى ۆيتسە-پرەمەر جاۋابىندا.
ونىڭ دەرەگىنشە، حالىقارالىق وڭ تاجىريبەنى ەسكەرە وتىرىپ، ءبىرقاتار وڭىردە پاترۋلدىك اۆتوموبيلدەردى زاماناۋي زياتكەرلىك كەشەندەرمەن جاراقتاندىرۋ تاجىريبەسى ەنگىزىلدى. ب ت ا ج جەلىسىن دامىتۋ اياسىندا «قورعاۋ - قاۋىپتى جۇرگىزۋشى» موبيلدى قوسىمشاسى ازىرلەندى. وندا «سەرگەك» جۇيەسىنىڭ كامەرالارى مەن ىشكى ىستەر مينيسترلىگىنىڭ جەدەل باسقارۋ ورتالىقتارىنىڭ مۇمكىندىكتەرى ينتەگراتسيالانعان.
«بۇل ناقتى ۋاقىت رەجيمىندە تەحنيكالىق تەكسەرۋدەن وتپەگەن، ساقتاندىرۋ ءپوليسىنسىز پايدالانىلاتىن، باعدارلارى بويىنشا ىزدەستىرىلەتىن جانە جالعان مەملەكەتتىك تىركەۋ نومىرلىك بەلگىلەرىن پايدالاناتىن اۆتوموبيلدەردى انىقتاۋعا مۇمكىندىك بەرەدى. بۇگىنگى تاڭدا مۇنداي موبيلدىك قوسىمشالار ەلىمىزدىڭ بارلىق وڭىرىندە ودان ءارى تاراتىلا وتىرىپ، 11 قالادا (استانا، الماتى، شىمكەنت، اتىراۋ، تۇركىستان، وسكەمەن، پەتروپاۆل، قاراعاندى، تەمىرتاۋ، كوكشەتاۋ جانە ورال) ەنگىزىلدى»، - دەدى رومان سكليار.