ب ۇ ۇ پاكىستاندىقتارعا گۋمانيتارلىق كومەك كورسەتۋ جوسپارىن جاريالادى. ونى جۇزەگە اسىرۋ ءۇشىن 160 ميلليون دوللار قاجەت، دەپ حابارلايدى قازاقپارات ب ۇ ۇ جاڭالىقتار ورتالىعىنا سىلتەمە جاساپ.
«پاكىستاندا بولعان «سوڭعى ونجىلدىقتاعى ەڭ ۇلكەن سۋ تاسقىنى» سالدارىنان شامامەن 33 ميلليون ادام زارداپ شەكتى دەگەن بولجام بار. ەلگە نوسەر جاڭبىر جاۋعان كەزدە، ياعني ماۋسىم ايىنىڭ ورتاسىنان باستاپ اپات مىڭنان استام ادامنىڭ، نەگىزىنەن بالالاردىڭ ءومىرىن قيدى»، - دەدى جەنيەۆادا وتكەن بريفينگىدە ب ۇ ۇ گۋمانيتارلىق ماسەلەلەردى ۇيلەستىرۋ باسقارماسىنىڭ وكىلى يەنس لاەركە.
«پاكىستان ازاپ شەگۋدە»، - دەدى ب ۇ ۇ باس حاتشىسى انتونيۋ گۋتەرريش وسى ەلگە ارناعان بەينەۇندەۋىندە. ول ەل تۇرعىندارى بۇرىن- سوڭدى بولماعان جاڭبىر مەن سۋ تاسقىنىنان زارداپ شەگىپ جاتقانىن اتاپ ءوتتى.
بۇگىنگى تاڭدا پاكىستانداعى سۋ تاسقىنى سالدارىنان شامامەن 500 مىڭ ادام ۇيلەرىن تاستاپ كەتتى، ولاردىڭ كوپشىلىگى ۋاقىتشا لاگەرلەردەن پانا تاپتى. سۋ تاسقىنى ميلليونعا جۋىق تۇرعىن ۇيلەردى قيراتىپ، زاقىمداعان. 700 مىڭ باس مال جوعالىپ كەتكەن.
گۋمانيتارلىق جاعداي كولىك ينفراقۇرىلىمىنا ايتارلىقتاي زالال كەلتىردى. الدىن الا بولجام بويىنشا، 3500 شاقىرىمعا جۋىق جول مەن 150 كوپىر بۇلىنگەن.
فوتو: news.un.org
اۆتور
اياۋلىم التىنبەك