جەمىس ىشىنەن تابىلعان كوكاين پارتياسى مەجەلى جەرگە جەتكەندە 330 ميلليون ا ق ش دوللارىنا باعالاناتىن ەدى.
BBC News اگەنتتىگى ەكۆادور كورشىلەس پەرۋ مەن كولۋمبيادا وندىرىلگەن كوكاين ترانزيتىنىڭ نەگىزگى ەلدەرىنىڭ بىرىنە اينالعانىن اتاپ ءوتتى. وتكەن جىلى ەلدە 200 توننادان استام ەسىرتكى تاركىلەندى، ونىڭ كوپ بولىگى گۋاياكيل پورتىندا تابىلدى.
ەكۆادور الەمدەگى ەڭ ءىرى بانان ەكسپورتتاۋشىسى بولعاندىقتان، كونترابانديستەر كوبىنەسە گۋاياكيلدەن بۇكىل الەمگە تاراتىلاتىن جەمىستەردىڭ اراسىنا زاڭسىز پارتيالاردى جاسىرۋعا تىرىسادى.
جەرگىلىكتى پوليسيا بەلگياعا جەتكىزىلۋى ءتيىس بانان قوراپتارى ارتىلعان كونتەينەردىڭ ىشىنەن ەسىرتكى تاپتى.
بەلگيا سوڭعى جىلدارى ەۋروپالىق وداقتا كوكايننىڭ ەڭ كوپ مولشەرى تاركىلەنگەن ەلگە، ال انتۆەرپەن پورتى زاڭسىز ەسىرتكى اكەلۋدىڭ نەگىزگى نۇكتەسىنە اينالدى.
ەۋروپالىق ەسىرتكى مەن ناشاقورلىقتى باقىلاۋ ورتالىعىنىڭ ديرەكتورى الەكسيس گوسديل وسى ايدا «كوكايننىڭ كوبەيۋى ءقازىر بۇكىل ەۋروپالىق وداققا قاۋىپ ءتوندىرىپ وتىرعانىن» مالىمدەدى.
ەكۆادوردا ەسىرتكى كونترابانداسىنا قاتىستى زورلىق- زومبىلىق كۇرت ءوستى، ويتكەنى ىقپالدى مەكسيكالىق كارتەلدەر وسىنداي تابىستى بيزنەستى باقىلاۋ ءۇشىن جەرگىلىكتى باندالارعا ەنىپ كەتتى. جەرگىلىكتى تۇرمەلەر تولىپ قالعان جانە تۇرمەدەگى قارسىلاس باندالار اراسىنداعى توبەلەس كوپتەگەن ادامداردىڭ ءومىرىن قيۋدا.