بىلتىر قازاقستانعا 33,7 مىڭنان استام ورالمان كەلدى
«قازاقستانعا كەلگەن ورالمانداردىڭ كوپشىلىگى، ياعني، 65,5 پايىز - وزبەكستاننان كەلگەن. سونداي- اق، 24,9 پايىز - قىتايدان، 3,2 پايىز - تۇرىكمەنستاننان، 2,7 پايىز - موڭعوليادان، 3,7 پايىز - وزگە ەلدەردەن ورالعان قانداستارىمىز»، - دەلىنگەن حابارلامادا.
ولاردىڭ باسىم بولىگى، ياعني 33,9 پايىز - وڭتۇستىك قازاقستان وبلىسىنا، 25,4 پايىز - الماتى وبلىسىنا، 10,6 پايىز - ماڭعىستاۋ وبلىسىنا، 5,8 پايىز - جامبىل وبلىسىنا، 24,3 پايىز ەلىمىزدىڭ وزگە وڭىرلەرىنە قونىستاندى.
ەلگە ورالعان قانداستارىمىزدىڭ 65,4 پايىز - ەڭبەككە قابىلەتتى جاستا بولسا، 16 جاسقا دەيىنگىلەرى - 28,6 پايىز ، زەينەتكەرلەر - 6 پايىز قۇرايدى.
ەڭبەككە جارامدى قانداستارىمىزدىڭ 10,8 - پايىزىنىڭ جوعارعى ءبىلىمى بار بولسا، 20,3 پايىزىندا ورتا ارناۋلى ءبىلىم بار، 65 پايىز ى- جالپى ورتا ءبىلىمى بار ازاماتتار، ال 3,9 پايىزىنىڭ ءبىلىمى جوق.
ەستەرىڭىزگە سالا كەتەيىك، «كەيبىر زاڭنامالىق اكتىلەرگە حالىقتىڭ كوشى- قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىندا ەتنيكالىق قازاقتاردى تاريحي وتانىنا ورالۋىن ىنتالاندىرۋ ماقساتىندا:
- ەتنيكالىق قازاقتارعا قونىستانۋ وڭىرىنە قاراماستان ورالمان مارتەبەسىن بەرۋ. ولارعا شەتەلدىك ازاماتتارعا قاراعاندا كوشى- قون پوليتسياسىنا حابارلاسۋ ارقىلى تولەم قابىلەتىن راستاۋسىز ۋاقىتشا تۇرۋ ىقتيارحاتىن الۋ مۇمكىندىگى بەرىلەدى؛
- ەتنيكالىق قازاقتارعا ۇكىمەت بەلگىلەگەن وڭىرلەرگە قونىستانعان جاعدايدا الەۋمەتتىك جيىنتىق بەرۋ. سونداي- اق، ەلىمىزدىڭ كەز كەلگەن وڭىرىنەن ۇكىمەت ايقىنداعان ەكىنشى وڭىرگە قونىستانعان ورالماننىڭ الەۋمەتتىك قولداۋدى الۋعا مۇمكىندىگى بولادى. ەگەر ولار قونىستانعان وڭىردەن 5 جىل مەرزىمنەن بۇرىن قونىس اۋدارىپ كەتەتىن بولسا، العان كومەكتەرىن ۇكىمەتكە قايتارۋ مىندەتتەرى قاراستىرىلعان.
- ورالماندارعا قازاقستان رەسپۋبليكاسىنىڭ ازاماتتىعىن بەرۋ مەرزىمىن ۋاقىتشا تۇرۋ ىقتيارحاتىن العاننان كەيىن 1 جىلعا دەيىن قىسقارتۋ كوزدەلەدى.