قىزىلوردا وڭىرىندە قىلمىستىق يەرارحيا قۇرعان ۇيىمداسقان توپتىڭ 32 مۇشەسى ۇستالدى
ۇزاق ۋاقىت جەدەل زەردەلەۋدەن كەيىن 18- قازاندا قىزىلوردا جانە ارال قالالارىندا «ا» ارنايى ماقساتتاعى قىزمەتتى جۇمىلدىرىپ، پروكۋراتۋرامەن بىرگە ىسكە اسىرىلعان ارنايى وپەراتسيا بارىسىندا وڭىرلىك ۇيىمداسقان قىلمىستىق توپتىڭ 32 قاتىسۋشىسى ۇستالدى.
توپتىڭ ءار مۇشەسىنىڭ وزىنە جۇكتەلگەن مىندەتىنە قاراي ناقتى قۇرىلىمى قالىپتاسقان. قاجەتتى شەشىمدەردى تۇراقتى تۇردە وتكىزىلىپ تۇراتىن «جينالىستاردا» قابىلداپ تۇرعان.
ۇستالعانداردىڭ قاتارىندا ترانسۇلتتىق قىلمىستىق ۇيىمداردىڭ توپ باسشىلارىنا باعىنىشتى جانە سولاردىڭ اتىنان ارەكەت ەتىپ، قىزىلوردا وبلىسىنىڭ قىلمىستىق يەرارحياسىندا بەلگىلى ءبىر دارەجەگە يە بولعاندار بار.
ولاردىڭ تۇرعىلىقتى مەكەن- جايلارى بويىنشا قارۋدىڭ بىرنەشە ءتۇرى، «ۇرىلار كاسساسىنىڭ» سمەتاسى، ەسىرتكى، سونىمەن قاتار تەرگەۋ ءۇشىن قىزىعۋشىلىق تۋدىراتىن وزگە دە زاتتار مەن قۇجاتتار الىندى.
قولعا تۇسكەندەر قىلمىستىق توپ قۇرۋ، باسقارۋ جانە قاراجاتتاندىرۋ، بوپسالاۋ سىندى اۋىر قىلمىستار جاسادى دەگەن كۇدىككە ىلىنگەن.
وسىلايشا ۇيىمداسقان قىلمىستىڭ قازاقستانداعى پوزيتسيالارىنىڭ جانە ەلدەگى قىلمىستىق احۋالعا اسەرىن كۇشەيتۋ بويىنشا جوسپارلارى بۇعاتتادى.
ترانسۇلتتىق قىلمىستان تونەتىن قاۋىپتى بەيتاراپتاندىرۋ بويىنشا ءىس- شارالار جالعاسىپ جاتىر.