الاماننىڭ بايگەنىڭ جۇلدەسى - 32,5 ميلليون تەڭگە

استانا. قازاقپارات - تاياۋدا استانادا سالتاناتتى تۇردە تۇڭلىگى تۇرىلگەن قازاق حاندىعىنىڭ 550 جىلدىق مەرەيتويى قازان ايىنىڭ 8-9 ى كۇندەرى وتە اۋقىمدى تۇردە جامبىل وبلىسىندا جالعاسىن تابادى.

وزگەسىن ايتپاعاننىڭ وزىندە «ۇلى دالا ويىندارى» اتىمەن ۇيىمداستىرىلاتىن بايگەنىڭ بىرنەشە ءتۇرىنىڭ جۇلدەسىنە 32 ميلليون 500 مىڭ تەڭگە تىگىلىپ وتىر. «نۇر وتان» پارتياسىنىڭ قولداۋىنىڭ جانە ۇلتتىق سپورت تۇرلەرى قاۋىمداستىعى مەن جامبىل وبلىسىنىڭ اكىمدىگىنىڭ تىكەلەي اتسالىسۋىنىڭ ارقاسىندا جۇزەگە اساتىن جارىستىڭ بارلىق جۇلدەسى تەك عانا دەمەۋشىلەردىڭ ەسەبىنەن جينالىپ وتىر.

- قازاق حاندىعىنىڭ 550 جىلدىعىنا وراي، تاعى ءبىر شارانى وتكىزۋگە بىلەك سىبانا كىرىستىك. ول - تاراز شاھارىنىڭ ورتالىق اتشابارىندا وتەتىن «ۇلى دالا ويىندارى»، - دەيدى كەشە ەلوردادا وتكەن باسپا ءسوز ءماسليحاتىندا ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان.

- مەملەكەت باسشىسى نۇرسۇلتان نازاربايەۆ ءبىر سوزىندە: «ءار ەلدىڭ ءوز ەرەكشەلىگى بولادى، جاپونيانى «كۇنشىعىس ەلى» دەيدى، قىتايدى «اسپاناستى ەلى» دەپ جاتادى. سول سياقتى ەۋرازيانىڭ دالاسىن جايلاعان ۇلان-عايىر دالاعا «ۇلى دالا ەلى» دەگەن اتاۋ لايىق» دەگەن بولاتىن. راسىمەن دە، ءبىز - ۇلى دالانىڭ مۇراگەرلەرىمىز. سوندىقتان دا تاراز قالاسىندا 8-9 -قازان كۇندەرى قازاق حاندىعىنىڭ 550 جىلدىعىنا وراي، ۇلى دالانىڭ ويىندارىن وتكىزبەكپىز. بۇل باعدارلامادا قازاقتىڭ ات سپورتىنا قاتىستى بارلىق ويىن تۇرلەرى ەنگىزىلەدى.

ۇيىمداستىرۋشىلاردىڭ مالىمدەۋىنشە، 31 شاقىرىمدىق الامان بايگە، توپ بايگە جانە ۇشقىر بايگە تويعا جينالعان قاۋىمنىڭ ايىزىن قاندىرىپ، ءتانتى ەتەرى ءسوزسىز. دەگەنمەن، وسىنداي شارا بارىسىندا ەڭ ءبىر ەسكەرىلمەي قالىپ جاتاتىن قاتاڭ ءتارتىپ ساقتاۋ جايى ولاردى دا ويلاندىرىپ وتىر. جوبا جەتەكشىلەرى ءاربىر جارىستان تاجىريبە جيناپ كەلە جاتقاندىقتان، وسى جولى كاسىبي بىلىكتىلىگى جوعارى تورەشىلەردى عانا تارتىپ، جارىس الاڭىنداعى ەرەجە مەن تالاپقا باعىنۋدى قاتاڭ قاداعالايتىندىقتارىن ەسكەرتۋدە.

«كوكپاردان ازيا چەمپيوناتىن وتكىزگەن ءبىرىنشى ەل - قازاقستان، اۋدارىسپاق پەن تەڭگە ىلۋدەن ازيا چەمپيوناتىن ءبىرىنشى وتكىزگەن ەل دە - قازاقستان، ازيا بويىنشا اساۋ ۇيرەتۋدى رەسمي قولداعان دا - قازاقستان. سوندىقتان ەندى وسى جەتىستىگىمىزدىڭ بارلىعىن وسىنداي تويدا كورسەتپەسەك، قاشان كورسەتەمىز؟! ات شاپقاندا ارقاسى قوزبايتىن قازاق جوق. ۇلى دالا ويىندارى اياسىندا جاقىن بايگە، الامان بايگە، ۇشقىر بايگە وتەدى. سونىمەن قاتار ەل اراسىندا اتى ايتىلعانمەن، زاتى جويىلىپ بارا جاتقان جامبى اتۋ جارىسىن ارنايى وسى ۇلى دالا ويىندارىنىڭ قاتارىنا قوسىپ وتىرمىز. سوندىقتان ات ۇستىندە شاۋىپ كەلە جاتىپ، اسقان شەبەرلىكپەن ساداق اتاتىنداردىڭ ونەرىن تاماشالايمىز. مۇنىڭ بارلىعى رۋحىمىزدى كوتەرىپ، ەلدىگىمىزدى ەڭسەلەندىرە تۇسەدى» دەيدى قاۋىمداستىق جەتەكشىسى تىلەۋحان مىرزا.

باسپا ءسوز ءماسليحاتىنا قاتىسقان جامبىل وبلىسى اكىمىنىڭ ورىنباسارى ابدالى نۇراليەۆ ۇلى تويعا دايىندىق بارىسىن اڭگىمەلەدى. ونىڭ ايتۋىنشا، بارلىق شارالار جوسپار بويىنشا اتقارىلىپ، اياقتالۋعا جاقىنداعان. مەملەكەتتىك مەكەمەلەر جاۋاپتى تۇستارعا بەكىتىلىپ، ازىرلىكتى كۇن سايىن پىسىقتاۋدا ەكەن. ازىرگە تاراز قالاسىنىڭ اۋەجايى جوندەۋدەن وتكىزىلىپ، «قازاق حاندىعى» مونۋمەنتىنىڭ قۇرىلىسى ءتامامدالعان.

 -  قازاق حاندىعىنىڭ 550 جىلدىق تويىنداعى ەڭ قىزىقتى باعدارلامالاردىڭ ءبىرى «ۇلى دالا ويىندارى» دەپ بىلەمىن -  دەيدى ا. نۇراليەۆ. -  اتاپ ەسكەرتەتىن جايت - جارىستى وتكىزۋگە تەك دەمەۋشىلەر تاراپىنان اقشا ءبولىندى. ياعني اكىمدىك نەمەسە مەملەكەتتىك بيۋدجەتتەن ارنايى قارجى بولىنگەن جوق. وسى رەتتە، ۇلتتىق سپورت تۇرلەرىن دامىتۋعا ۇلەس قوسىپ جاتقان دەمەۋشىلەردىڭ جومارتتىعىن ايتا كەتۋ كەرەك.

سونىمەن، جۇلدە قورىنا توقتالسام، الامان بايگەنىڭ 1-ورنىنا 10 ميلليون تەڭگە، 2-ورىنعا 5 ميلليون تەڭگە، 3-ورىنعا -  2 ميلليون تەڭگە، تاعى جەتى اتقا اقشالاي جۇلدەلەر بەرىلەدى. وسىلايشا، تەك الامان بايگەنىڭ جۇلدە قورى 19 ميلليون تەڭگەنى قۇراپ وتىر. ەكىنشى بايگە -  توپ بايگەدە جۇيرىك بەس جىلقىعا جۇلدە بەرىلەدى. توپ بايگەدە 1-كەلگەن ات يەسىنە -  5 ميلليون تەڭگە، 2-ورىن العان اتقا 2 ميلليون تەڭگە، ءۇشىنشى ورىن العان جىلقى يەسىنە 1 ميلليون تەڭگە، 4-ورىنعا 500 مىڭ تەڭگە، بەسىنشى كەلگەن جىلقىعا 300 مىڭ تەڭگە جۇلدە تىگىلىپ وتىر. ال ۇشقىر بايگەدە ءبىرىنشى كەلگەن جىلقى يەسىنە 3 ميلليون تەڭگە، ەكىنشى ورىن يەسى 1 ميلليون تەڭگە، 3-ورىن يەسىنە 500 مىڭ تەڭگە بەرىلەدى.

جالپى، «ۇلى دالا ويىندارى» جارىسىنىڭ جۇلدە قورى 32 ميلليون 500 مىڭ تەڭگەنى قۇرايدى. بۇگىندە 150 دەن استام سايگۇلىكتى بايگەگە قوسۋعا ءوتىنىش ءبىلدىرىلدى.

جامبىلدىقتار قازىرگى كەزدە جارىس وتەتىن اتشاباردى دايىنداپ جاتىر. اتالعان مەرەيتوي كۇنى مۇنداعى ناعىز الامان بايگە جينالاتىن قالىڭ قاۋىمنىڭ قۋانىشىن ەسەلەيتىندىگى انىق.

 بەيسەنباي داۋلەت ۇلى، استانا

ايقىن- اقپارات