ماقتارالدىق 32 جاستاعى كەلىنشەك 3 قىزدى قاتار ومىرگە اكەلدى - فوتو

تۇركىستان. قازاقپارات - تۇركىستان وبلىسىندا ۇشەم دۇنيەگە كەلدى، دەپ حابارلايدى قازاقپارات ءتىلشىسى.

جەتىساي اۋداندىق ورتالىق اۋرۋحاناسىندا ۇشەم دۇنيەگە كەلدى. بۇعان دەيىن 3 قىز، 1 ۇلدى تاربيەلەپ وتىرعان ماقتارال اۋدانىنىڭ تۇرعىنى نافيسا حامزايەۆا بىردەن 3 قىزدى ومىرگە الىپ كەلدى.

32 جاستاعى كەلىنشەك ىشىندەگى نارەستەلەرىنىڭ ەگىز ەكەنىن ەستىگەندە جولداسى ەكەۋى قاتتى قۋانعاندارىن ايتادى. ايتسە دە، سوڭعى ايلاردا جەتىساي اۋداندىق اۋرۋحاناسىنىڭ دارىگەرى راحيما جۇمابەك قىزى ىشتەگى سابيلەردىڭ ەگىز ەمەس، ۇشەم ەكەنىن انىقتاپ، جۇكتى كەلىنشەكتىڭ كۇتىمى مەن باقىلاۋىن كۇشەيتكەن.

«مەنىڭ تولعاق قىسىپ، پەرزەنتحاناعا كەتكەنىمدى جولداسىم دا، اتا-ەنەم دە بىلمەيدى. جولداسىم اسكەري قىزمەتكەر بولعاندىقتان بولەك تۇرامىز. جاعدايىمدى ايتىپ، ەشكىمدى ۋايىمداتقىم كەلمەدى. ەندى مىنە، جاناشىر دارىگەرلەرىمىزدىڭ بىلىكتىلىگىنىڭ ارقاسىندا پەرزەنتتەرىمدى باۋىرىما باسىپ وتىرمىن. ايتار العىسىم شەكسىز»، - دەيدى جاس انا.

قازىردە ۇشەمدەر مەن اناسىنىڭ جاعدايى جاقسى، دارىگەرلەردىڭ ءجىتى باقىلاۋىندا.

جالپى جەتىساي اۋداندىق اۋرۋحاناسى دارگەرلەرىنىڭ مالىمەتىنشە، اۋداندا ەگىز تۋىلعان سابيلەر قاتارى كوپ بولعانىمەن، ۇشەمدەردىڭ دۇنيەگە كەلۋى سيرەك كەزدەسەدى. بيىلعى جىلدىڭ باسىنان بەرى ورتالىق اۋرۋحانادا 3 مىڭنان استام ءسابي جارىق دۇنيە ەسىگىن اشقان بولسا، سونىڭ 33 ى ەگىزدەر بولعان. ال، ۇشەمدەردىڭ دۇنيەگە كەلۋى سوڭعى 10 جىلدا العاش رەت تىركەلىپ وتىر.