قارجى پيراميداسىنان 31 مىڭنان استام قازاقستاندىق زارداپ شەككەن
«وتكەن جىلى ەلىمىز بويىنشا 31 مىڭنان استام ازامات قارجى پيراميدالارىنان جاپا شەكتى. ولارعا 54 ميلليارد تەڭگەدەن استام سوماعا زالال كەلدى. بۇگىنگى تاڭدا ىشكى ىستەر ورگاندارىنىڭ وندىرىسىندە وسى ساناتتاعى 65 قىلمىستىق ءىس بار، 3 مىڭنان استام جابىرلەنۋشى تانىلدى. تاجىريبە كورسەتكەندەي، سوڭعى جىلدارى قىلمىسكەرلەردىڭ قىزمەتى ەكونوميكالىق بەلسەندىلىكتىڭ جوعارىلاۋىمەن، سونداي- اق حالىقتىڭ ينۆەستيتسياعا قىزىعۋشىلىق تانىتا باستاۋىمەن بايلانىستى. سۇرانىس ۇسىنىستى تۋدىرادى»، - دەدى دەپارتامەنت باستىعى ورتالىق كوممۋنيكاتسيالار قىزمەتىندەگى باسپاءسوز ءماسليحاتىندا.
ونىڭ اتاپ وتۋىنشە، قارجى پيراميدالارى بۇگىندە ءوزىن ۇستەمە ينۆەستيتسيا سالاسىنداعى تابىستى ۇيىمدار رەتىندە كورسەتىپ وتىر. وزدەرىنىڭ جارناما كامپانيالارىندا ولار «يننوۆاتسيالىق جوبا»، «تيىمدىلىگى جوعارى بيزنەس»، «بىرەگەي»، «اسا ءتيىمدى»، «تابىسقا كەپىلدىك بەرەمىز» سىندى سوزدەردى پايدالانادى.
«الاياقتار زاڭدى ميكروقارجىلىق ۇيىمدارمەن، بۋكمەكەرلىك كەڭسەلەرمەن، تۇتىنۋ كووپەراتيۆتەرىمەن جانە جابىق ينۆەستيتسيالىق پاي قورلارىمەن جاسىرىنا الادى. قارجى پيراميدالارىن ۇيىمداستىرۋشىلار ونلاين- تابىس نەمەسە جوعارى تابىستى ونلاين- جوبانى ۇسىنا وتىرىپ، الەۋمەتتىك جەلىلەردە بەلسەندى جۇمىس جۇرگىزۋدە. ولار تانىمال مەسسەندجەرلەردە چات اشادى جانە قاتىسۋشىلاردى ءتۇرلى ۇتىس ويىندارىمەن، ساۋالنامالارمەن جانە باسقا دا ماركەتينگتىك امالدارمەن تارتادى»، - دەدى سانجار ءادىلوۆ.
اۆتور: مارلان جيەمباي